შეჯიბრი სნაიპერული შაშხანიდან სროლაში

შეჯიბრი სნაიპერული შაშხანიდან სროლაში

27.06.2015

1743664_1011043762261699_6907418899394577273_n

საქართველოს შეიარაღებულ ძალებში სნაიპერული შაშხანიდან სროლაში ტურნირი გაიმართა. შეჯიბრი IV მექანიზირებული ბრიგადის სასროლეთზე ჩატარდა. სპორტულ ღონისძიებაში საქართველოს შეიარაღებული ძალების სხვადასხვა ქვედანაყოფის 21 გუნდი მონაწილეობდა. ტურნირის I ეტაპზე სამხედრო მოსამსახურეებს 100, 200 და 300 მეტრიანი დისტანციის დაძლევა მოუხდათ. II და III ეტაპზე გადასული გუნდები უკვე 500-დან 700 მეტრამდე და 500-დან 900 მეტრამდე დისტანციებზე სროლაში შეეჯიბრნენ.

ჩემპიონატს თავდაცვის სამინისტროს სხვადასხვა სტრუქტურული ერთეულებიდან სპეციალურად ტურნირისთვის დაკომპლექტებული კომისია აკვირდებოდა.

გამარჯვებულები სამ საპრიზო კატეგორიაში როგორც გუნდური, ასევე ინდივიდუალურად შეგროვებული ქულების საერთო რაოდენობის მიხედვით გამოვლინდნენ. შეჯიბრში II და III ადგილებზე გასულ ქვედანაყოფებს და სამხედროებს შესაბამისი მედლები და სიგელები, ხოლო პირველ ადგილზე გასულ ქვედანაყოფს და 2 სამხედროს სიგელებთან ერთად ჩემპიონატის თასიც გადაეცათ.

გუნდურში პირველი ადგილის მფლობელი 531 ქულით სპეციალური ოპერაციების ძალები გახდა; მეორე ადგილი 523 ქულით V ქვეით ბრიგადას ერგო წილად, ხოლო მესამე ადგილზე 518 ქულით IV მექანიზირებული ბრიგადა გავიდა.

პ.ს. სნაიპერი — მაღალმომზადებული მებრძოლი, რომელიც სამიზნეს ესვრის შენიღბული პოზიციიდან, ან მანძილიდან, რომელიც მიუწვდომელია რეგულარული ჯარის ქვეითების ცეცხლისთვის. ჩვეულებრივ სნაიპერებს გავლილი აქვთ სპეციალური წვრთნები და აღჭურვილნი არიან განსხვავებული, ზეზუსტი შაშხანებით. სამხედრო სნაიპერები ასევე გაწვრთნილები არიან შენიღბვაში, საველე ეშმაკობებში, ინფილტრაციაში, დაზვერვისა და დაკვირვების ტექნიკაში.

 

You may also like...