43-ე ბატალიონი საქართველოში სრულად დაბრუნდა
43-ე ბატალიონი საქართველოში სრულად დაბრუნდა
20.10.2015
თავდაცვის სამინისტროს მიერ გავრცელებული ინფორმაციის თანახმად საქართველოს შეიარაღებული ძალების IV მექანიზირებული ბრიგადის 43-ე ბატალიონი ავღანეთის ისლამური რესპუბლიკიდან, ნატოს ეგიდით მიმდინარე „მტკიცე მხარდაჭერის“ მისიის დასრულების შემდეგ, საქართველოში სრული შემადგენლობით დაბრუნდა. ბოლო ნაკადს ჩამოჰყვა ბატალიონის მეთაური, ვიცე-პოლკოვნიკი ვიტალი ცხადაძეც.
ალექსეევკას სამხედრო აეროდრომზე 43-ე ბატალიონის სამხედრო მოსამსახურეებს საქართველოს თავდაცვის მინისტრი თინათინ ხიდაშელი, აშშ-ის ელჩი საქართველოში იან კელი და საქართველოს შეიარაღებული ძალების მაღალი რანგის წარმომადგენლები დახვდნენ. მათ ჯარისკაცებს სამშობლოში მშვიდობით დაბრუნება და მისიის წარმატებით განხორციელება მიულოცეს.
IV მექანიზირებული ბრიგადის სამხედრო მოსამსახურეებთან ერთად, პირველად საქართველოს შეიარაღებული ძალების ისტორიაში, ავღანეთში ეროვნული გვარდიის გაძლიერებული ოცეულიც იმყოფებოდა.
„როტაცია დასრულდა, ეს ბოლო შემადგენლობა იყო, რომელიც მეთაურთან ერთად და დროშებით ჩამოვიდა საქართველოში. ახალი შემადგენლობა უკვე ავღანეთში იმყოფება. მათ გაიარეს სრულფასოვანი მზადება, როგორც საქართველოში, ისე გერმანიაში, როგორც ეს გათვალისწინებულია ნატოს სტანდარტებით. ჩვენ „მტკიცე მხარდაჭერის“ მისიის ფარგლებში აღებული გვაქვს ვალდებულება 2016 წლის ბოლომდე, თუმცა საზოგადოებამ იცის, გასულ კვირას გავრცელდა ინფორმაცია პრეზიდენტ ობამას ინიციატივის შესახებ, რომელიც ავღანეთში მისიის წინასწარ დათქმული ვადების გადახედვას ეხება. ქართული სახელმწიფო, როგორც ერთგულ პარტნიორს სჩვევია, აცხადებს მზადყოფნას, უსაფრთხოების დაცვისთვის ავღანეთის რესპუბლიკაში კოალიციურ ძალებთან ერთად იმსახუროს. ეს გეგმები არ არის საბოლოოდ დასრულებული და ცნობილი. ნატოს ფორმატში ბევრი დისკუსია იმართება, ეს რეგულარული პროცესია. იდეა ივნისის მინისტერიალის დროს გაჟღერდა – გერმანიის თაოსნობით, დღეს უკვე ობამას ინიციატივაც გვაქვს სახეზე. ჩვენ კიდევ ერთხელ ვამბობთ, რომ როგორც ნატოს პარტნიორი ქვეყანა, რომელიც მზადაა ნატოს წევრობისთვის, მზად ვართ, ალიანსის გვერდში ვიდგეთ უსაფრთხოების მისიაში,“ – განაცხადა საქართველოს თავდაცვის მინისტრმა თინათინ ხიდაშელმა.
„ჩემთვის დიდი პატივია, რომ ვესწრები დღევანდელ ცერემონიალს. ჩვენ ყველანი გულითადად ვხვდებით საქართველოს მამაც შვილებს, ქალებსა და ვაჟებს. საქართველომ ნამდვილად დიდი მსხვერპლი გაიღო იმ პრინციპებისა და ღირებულებების დასაცავად, რომელიც ჩვენთვის საერთოა. დღეს ჩვენ ვიხსენებთ იმ მსხვერპლს, რომელიც გაიღო რიგითმა ყულჯანიშვილმა. რასაკვირველია, ჩვენი ფიქრები მის ოჯახთან არის. ვუსურვებთ გამოჯანმრთელებასა და მწყობრში ჩადგომას სერჟანტ როსტობაიას,“ – განაცხადა ამერიკის შეერთებული შტატების ელჩმა საქართველოში იან კელიმ.
43-ე ბატალიონი მასზე დაკისრებულ ამოცანებს ამერიკის შეერთებული შტატების არმიის სარდლობის ხელმძღვანელობით ბაგრამის საავიაციო ბაზაზე ასრულებდა. მისიის ფარგლებში ქართველი სამხედრო მოსამსახურეები ამერიკელ საზღვაო ქვეითებთან ერთად, სრული სპექტრის ოპერაციებს ახორციელებდნენ, მათი მთავარი ამოცანა დისლოკაციის ადგილის უსაფრთხოების უზრუნველყოფა იყო. სამშობლოში დაბრუნებული ქვედანაყოფი ავღანეთში II ქვეითი ბრიგადის 22-ე ბატალიონმა ჩაანაცვლა.
მიმდინარე წლის სექტემბერში „მტკიცე მხარდაჭერის“ მისიით გათვალისწინებული მორიგი ოპერაციისას 43-ე ბატალიონის სამხედრო მოსამსახურე, პირველი კლასის რიგითი ვასილ გელას ძე ყულჯანიშვილი დაიღუპა. იმავე ოპერაციისას დაიჭრა სერჟანტი პაატა ზაურის ძე როსტობაია. დაშავებული ქართველი სამხედრო ამჟამად მკურნალობის კურსს გერმანიაში, ლანდშტულის სამხედრო ჰოსპიტალში გადის.აღნიშნულია თავდაცის სამინისტროს განცხდებაში.
