“Agile Spirit 2015”-ის დასკვნითი ფაზა
“Agile Spirit 2015”-ის დასკვნითი ფაზა
19.07.2015
საქართველოს უმაღლესი მთავარსარდალი გიორგი მარგველაშვილი, თავდაცვის მინისტრი თინათინ ხიდაშელი და გენერალური შტაბის უფროსი, გენერალ-მაიორი ვახტანგ კაპანაძე ნატოს მრავალეროვნული სამხედრო სწავლების „Agile Spirit 2015“-ის მიმდინარეობას გაეცნენ. ვაზიანის IV მექანიზირებული ბრიგადის ბაზაზე სტუმრებს სწავლების ხელმძღვანელმა პოლკოვნიკმა არჩილ ომიაძემ „Agile Spirit 2015“-ის შესახებ პრეზენტაცია წარუდგინა, რის შემდეგაც სტუმრებმა სასწავლო ობიექტები მოინახულეს და საველე ბანაკსაც ესტუმრნენ.
საქართველოს თავდაცვის მინისტრის თინათინ ხიდაშელის განცხადებით, მსგავსი სწავლებების მიზანი ქვეყნის უსაფრთხოების გაზრდაა.
„ყველაზე უფრო მთავარი და მნიშვნელოვანია ის შეფასებები, რომელსაც ჩვენი ჯარისკაცები მიიღებენ. წინ ძალიან დიდი გეგმები გვაქვს საქართველო-ნატოს სწავლებებისთვის. დღევანდელი სწავლება შესაძლოა, იყოს ყველაზე უფრო პრინციპულად მნიშვნელოვანი იმისათვის, რომ გადაწყდეს სრულფასოვნად ვიქნებით თუ არა ამ ციკლში ჩართული 2016 წელს. ეს არის, სწორედ, ერთ-ერთი ის ტერიტორია, სადაც ერთობლივი წვრთნისა და შეფასების ცენტრი (JTEC) განთავსდება. ეს დამატებით შესაძლებლობებს გვიქმნის და უფრო მეტ შანსს აძლევს საქართველოს, რომ ერთი მხრივ, ჯარისკაცი უკეთ გაწვრთნილი იყოს, მეორე მხრივ, მისი უსაფრთხოება იყოს უფრო მეტად დაცული და მესამე – რაც შეიძლება მეტი ნატოს ჯარისკაცი იყოს მუდმივად სხვადასხვა წვრთნების დროს, სხვადასხვა როტაციებით საქართველოში. ეს 300-მდე ამერიკელი ჯარისკაცი, რომელიც დღეს ჩვენთან ერთად არის, ასევე ლიტველი, ლატვიელი, რუმინელი და ბულგარელი ჯარისკაცები, ალბათ ყველაზე უფრო საუკეთესო დაცვაა ჩვენი ქვეყნისთვის. ყველა საქებარი სიტყვა, სწორედ, ამ მასშტაბის და წვრთნების რაოდენობის გაზრდისთვის უნდა გამოვიყენოთ. ეს უკვე ჩვენი, პოლიტიკოსების საქმეა, ჯარისკაცები თავის საქმეს წარმატებით ართმევენ თავს“, – განაცხადა თინათინ ხიდაშელმა.
ნატოს სამხედრო სწავლება, რომელშიც პარტნიორი ქვეყნის წარმომადგენლები მონაწილეობენ, ნატო-საქართველოს არსებითი პაკეტის ფარგლებში ხორციელდება. უელსის სამიტზე მიღებული არსებითი პაკეტის ერთ-ერთ პრიორიტეტულ მიმართულებას საქართველოს ტერიტორიაზე ნატოს სწავლებების ჩატარება წარმოადგენს.
„აქ არის სრული სპექტრის ოპერაციები, რომელიც მოიცავს როგორც სამშვიდობო, ასევე, ჩვეულებრივ კონვენციურ ოპერაციებს. ძალიან კმაყოფილი ვარ და შედეგები ნამდვილად უფრო მეტია, ვიდრე დაგეგმილი იყო. რაც მთავარია, კიდევ ერთხელ დადასტურდა, რომ ქართულ შეიარაღებულ ძალებს აქვს შესაძლებლობა, იყოს სრულად თავსებადი ჩვენს პარტნიორ ქვეყნებთან“, – აღნიშნა გენერალური შტაბის უფროსმა, გენერალ-მაიორმა ვახტანგ კაპანაძემ.
აშშ-ის საზღვაო ქვეითთა მე-10 პოლკის მეთაურმა პოლკოვნიკი ვაინსთეინმა კი განაცხადა: „Agile Spirit“ შეიარაღებულ ძალებს შორის ურთიერთთავსებადობის გაზრდას უწყობს ხელს. „წვრთნები გვეხმარება უკეთ ვიმუშაოთ ქართველ, რუმინელ, ბულგარელ, მოლდოველ და ლიტველ სამხედროებთან ერთად. ვმონაწილეობთ საშტაბო სწავლებაში, რომელიც სიმულაციური სცენარის მიხედვით ვითარება. ეს საშუალებას გვაძლევს ვისწავლოთ, თუ როგორ იმოქმედონ ჩვენმა ჯარებმა სამხედრო და სამოქალაქო ოპერაციების დროს, ასევე, ჰუმანიტარული დახმარების აღმოჩენის შემთხვევაში. საველე წვრთნა, რომელშიც ქართველი, რუმინელი და ამერიკელი სამხედროები მონაწილეობენ, საცეცხლე მომზადებასაც მოიცავს. მონაწილეები ერთად ვცდილობთ საერთო ამოცანებისა და მიზნების მიღწევას. განსაკუთრებით მინდა აღვნიშნო ქართული სტუმართმოყვარეობა, თქვენი ქვეყნის კულტურა. თავს ისე ვგრძნობთ, როგორც საკუთარ სახლში და ძალიან მადლიერები ვართ მასპინძლობისთვის. მოხარული ვარ, რომ ამ სწავლებაში ერთად ვმონაწილეობთ, რაც კიდევ უფრო ამყარებს 10-წლიან მეგობრობას ჩვენი ქვეყნების შეიარაღებულ ძალებს შორის.“
მრავალეროვნული სამხედრო სწავლება „Agile Spirit 2015“, რომლიც საშტაბო და საველე მომზადება ითვალისწინებს 8 ივლისს დაიწყო და 22 ივლისამდე გაგრძელდება. სწავლების ფარგლებში მრავალეროვნული ბრიგადის შტაბი შეიქმნა, რომელიც, ძირითადად, ქართველი სამხედრო მოსამსახურეებითაა დაკომპლექტებული. საშტაბო და საველე წვრთნების მიზანს კონვენციური ოპერაციების დროს ურთიერთქმედების დახვეწა და სხვადასხვა ქვეყნების სამხედრო ტაქტიკის გაცნობა წარმოადგენს.
