მრავალმიზნობრივი დანიშნულების მობილური სარაკეტო სისტემა RPG 32

მრავალმიზნობრივი დანიშნულების მობილური სარაკეტო სისტემა RPG 32

15.05.2016.


მრავალმიზნობრივი (ძირითადად ანტისატანკო დანიშნულების) მობილური სარაკეტო სისტემა RPG 32 რუსულმა მხარემ იორდანიის შეკვეთით დაამზადა. იარაღზე რუსული სახელმწიფო კომპანია FGUP “Bazalt”-ი მუშაობდა. სისტემა 2005-2007 წელს შეიქმნა, გამოიცადა და უკვე 2008 წელს იორდანიამ შეკვეთის პირველი პარტიები მიიღო RPG-32 “Hashim”-ის სახელდებით. იარაღმა იორდანიის მოლოდინი გაამართლა, მისმა შესაძლებლობებმა დააკმაყოფილა სამხედროთა მოთხოვნილებები და ამჟამად რუსეთსა და იორდანიას შორის მიმდინარეობს მოლაპარაკება, რათა იორდანიის მხარემ, კომანია JRESCO-მ, იარაღი და მისი საბრძოლო მასალა მასობრივად ჩაუშვას წარმოებაში. რაც შეეხება თვითონ იარაღს-იგი გახლავთ მოდულური სარაკეტო სისტემა, რომელიც მემკვიდრეა უკვე მრავალგზის გამოცდილი, მსოფლიოში აპრობირებული და წარმატებული მსგავსი დანიშნულების რუსული ანალოგების. RPG-32-ს წარმატებით შეუძლია ბრძოლა როგორც თანამდეროვე ტანკების, ასევე ჯავშანტრანსპორტიორების, ქვეითთა საბრძოლო მანქანების, ბუნკერების, სამეთაურო პუნქტების და სხვა სამხედო დანიშნულების შენობა-ნაგებობების თუ ტექნიკის წინააღმდეგ.


იორდანელი სამხედრო RPG-32 “Hashim”-ით

იარაღის გამოყენების ასეთ მრავალფეროვან საშუალებას უზრუნველყოფს მისი ოთხი სახეობის რაკეტა. ეს ოთხი სახეობის რაკეტა ორ ჯგუფად იყოფა-105 მმ-იანებად და შედარებით მცირე, 72 მმ-იანებად. სისტემა ეფექტურია ისეთ ტანკებთან საბრძოლველად, რომლებიც აღჭურვილნი არიან ERA დაცვის დონით (ERA-explosive reactive armour. ქართ: ფეთქებად-რეაქტიული ჯავშანი). იარაღში გაუმჯობებსებულია რაკეტის თერმობარული შესაძლებლობები, რაც მეტ ეფექტს იძლევა. RPG-32 შედგება მრავალჯერადი გამოყენების გამშვები მილისაგან, დასაკეცი ხელისმოსაჭიდისაგან, მაღალი დონის სამიზნე და ცეცხლის მართვის მოწყობილობებისაგან. აღსანიშნავია, რომ ორივე ჯგუფის რაკეტების მოქმედების დიაპაზონი ერთნაირია. რაკეტა ფრენისთვის იყენებს მყარ საწვავს, სტაბილური და შეძლებისდაგვარად მაღალი დონის საფრენოსნო მახიასიათებლებისთვის კი დასაკეც/გასაშლელ “ფარფლებს”.


RPG-32-ის რაკეტები

მონაცემები:

კალიბრი: 105 მმ, 72 მმ
ტიპი: სარაკეტო
სიგრძე: 1200 მმ (105 მმ რაკეტით) ან 900 მმ (72 მმ რაკეტით)
წონა (არასაბრძოლო მდგომარეობაში): 3 კგ
წონა (საბრძოლო მდგომარეობაში): 10 კგ (105 მმ რაკეთით) ან 6 კგ (72 მმ რაკეტით)
მოქმედების ეფექტური დიაპაზონი: 200+ მ

იხილეთ ვიდეო:

ლექსო ლომაშვილი

მასალის გამოყენება ავტორის ნებართვის გარეშე აკრძალულია

წყარო: world.guns

You may also like...