ახალი რუსული ჯავშანტრანსპორტიორი Bumerang

ახალი რუსული ჯავშანტრანსპორტიორი Bumerang

12.05.2016

დღესდღეობით რუსულ არმიას მასობრივად ემსახურება ჯავშანტრანსპორტიორი BTR-80 და მისი განახლებული ვერსია BTR-82. ცოტამ თუ იცის, რომ რუსეთში ჯერ კიდევ 90-იან წლებში შემუშავდა უახლესი თაობის ჯავშანტრანსპორტიორის-BTR-90-ის პროექტი, რომელიც წინამორბედი BTR-80-ის ჩამნაცვლებელი ვარიანტი უნდა ყოფილიყო, თუმცა გარკვეული მიზეზების გამო იგი შეიარაღებაში ვერ შევიდა. სავარაუდო მიზეზი კი ფინანსური პრობლემებია. ახალ ვარიანტში შეიარაღებასთან ერთად მნიშვნელოვნად გაძლიერებული იყო დაცვის დონე და მობილურობა, ასევე გაზრდილი იყო შიდა მოცულობა. 2010 წელს რუსეთის არმიამ შეწყვიტა BTR-ების შეძენა და განაახლა პროექტი “BTR-90”. ამის ფარგლებში თავდაცვის სამინისტრომ მოითხოვა (2011 წელს) მოდურალური ჯავშნით აღჭურვილი ჯავშანტრანსპორტიორი, რომელსაც ჯავშანთან ერთად სხვა თანამედროვე სიახლეებიც ექნებოდა დაცვისა და შეიარაღების ყველა სფეროში. პროექტს ახალი სახელდება Bumerang (boomerang) მიენიჭა. აღსანიშნავია, რომ ამ პროექტთან ერთად რუსეთმა კიდევ დაიწყო სხვა პროექტი უახლესი ჯავშანტრანსპორტიორებისა და ქვეითთა საბრძოლო მანქანების “ოჯახზე” Kurganets-სზე. პროექტი გასაიდუმლოებული იყო. პირველი გასაჯაროვება ახალი ჯავშანტრანსპორტიორის მოხდა რუსი სამხედრო მაღალჩინოსნების მიერ 2013 წელს. იმავე წელს რუსულ არმიას გადაეცა პროტოტიპები მათი გამოცდების და შესწავლის მიზნით. ჯავშანტრანსპორტიორის ნახვის შესაძლებლობა საზოგადოებას კი მხოლოდ 2015 წელს მიეცა. იმავე წელს რუსულმა არმიამ შეირაღებაში მიიღო ჯავშანტრანსპორტიორის მცირე პარტია. წელს კი მისი მასობრივი წარმოების დაწყებაა დაგეგმილი. მას შემდეგ, რაც პროექტის სრულმასშტაბიანი წარმოება დაიწყება, არმიას თავდაპირველად გადაეცემა პირველი და მსხვილი პარტია 2000 ერთეულის შემადგენლობით, რომელიც ჩაანაცვლებს მოძველებულ და რესურსგაცლილ ანალოგებს.

Bumerang-ი არის უახლესი დიზაინის ჯავშანტრანსპორტიორი. იგი არ არის რაიმეს ბაზაზე დაფუძნებული. მისი ბაზა შემუშავებულია სპეციალურად მისთვის დ არის ახალი სიტყვა რუსულ წარმოებაში. Bumerang-ის რიგი კომპონენტები და ქვესისტემები მიაგავს ასევე უახლეს რუსულ ჯავშანტრანსპორტიორ Kurganets-ის დეტალებს, ისევე როგორც პირიქით, ანუ ეს ორი უახლესი ტექნიკა ერთმანეთის ურთიერთშემცვლელ დეტალებს იმეორებს, რაც სწორი გათვლაა. Bumerang-ში ძრავი განთავსებულია წინა ნაწილში. დესანტს ჯავშანტრანსპორტიორის დატოვება და მასში ჩასხდომა უკანა მხირდან შეუძლია, რაც მათ მტრის ცეცხლისაგან იცავს. ჯავშანტრანსპორტიორს ემსახურება ეკიპაჟის სამი წევრი-მეთაური, მძღოლი და მსროლელი. დესანტის რაოდენობა კი 9 სრულად აღჭურვილ ჯარისკაცს შეადგენს. ჯავშანტრანსპორტიორის კორპუსი და კოშკურა შედუღებული ლითონის ფურცლებითაა დამზადებული. დაცვის დონეს ამაღლებს მოდურალური ჯავშანი. აღსანიშნავია, რომ მოთხოვნის შესაბამისად შესაძლებელია ჯავშნის უფრო მაღალ საფეხურზე აყვანაც. როგორც ცნობილია საბაზისო მოდელის დაჯავშნა უძლებს ნებისმიერი ცეცხლსასროლი იარაღს ტყვიებს, მათ შორის 14.5 მმ-იან ჯავშანგამტან ტყვიებსაც და საარტილერიო ჭურვების ნამსხვრევებს. დაცვის დონეში ასევე შედის NBC დაცვის დონეც (NBC-ბირთული, ბიოლოგიური და ქიმიური დაბინძურება). ჯავშანტრანსპორტიორის ფსკერი V-ს ფორმისაა, რომელიც როგორც ცნობილია აფეთქების ტალღას ორად ხლეჩს და მიმართავს სხვადასხვა მხარეს, რაც ფატალურ შედეგს მნიშვნელოვნად ამიცრებს.

ასევე აღსანიშნავია, რომ Bumerang-ი აღჭურვილია ხანძარსაწინააღმდეგო სისტემებით და საჭიროების შემთხვევაში მისი აქტიური დაცვის სისტემებით აღჭურვაც არ წარმოადგენს პრობლემას. ჯავშანტრანსპორტიორის კოშკურა დისტანციურად მართადია. Bumerang-ი ორნაირი კოშკურით შეიძლება იყოს აღჭურვილი-პირველი ესაა ჯავშანტრასპორტიორ Kurganets APC-ის მსგავსი კოშკურა, რომელიც 12.7 მმ-იანი ტყვიამფრქვევითაა შეიარაღებული და მეორე, ასევე Kurganets-ის ოჯახის წარმომადგენელი ქვეითთა საბრძოლო მანქანა Kurganets  IFV-ის მსგავსი კოშკურა, რომელიც უკვე 30 მმ-იანი ქვემეხითაა აღჭურვილი, მასთან შეწყვილებულ 7.62 მმ-იან ტყვიამფრქვევთან და ანტისატანკო სარაკეტო სისტემა kornet-თან ერთად (რაკეტების რაოდენობა 4 ერთეული). ჯავშანტრანსპორტიორის ძრავი ტურბო-დიზელისაა და 500 ცხენის ძალას ანვითარებს. გადაცემათა კოლოფი ავტომატურია. თვლების გათვლა 8×8-ზეა. Bumerang-ის ყველა ბორბალი აღჭურვილია საბურავის წნევით დაბერვის სისტემებით, რაც საბურავის დაზიანების შემთხვევაში ავტომატურად მოდის მოქმედებაში და დაზიანებულ საბრავში მაქსიმალურად ინარჩუნებს წნევას, რათა ტექნიკას გადაადგილებისას არ შეექმნას პრობლემა. წნევის რეგულაცია 60 კილომეტრზე მეტ მანძილზე ხდება. აღსანიშნავია, რომ ჯავშანტრანსპორტიორი სრულად ამფიბიურია. წყალში გადაადგილებისას მას ორი წყლის რეაქტიული ამაჩქარებელი ეხმარება. Bumerang-ის ოჯახი ასევე მოიცავს შეჯავშნული სასწრაფო დახმარების, სამეთაურო მანქანის, სადაზვერვო ვარიანტის, ტანკსაწინააღმდეგო სარაკეტო გადამზიდის, საავიაციო თავდაცვის სარაკეტო-გამშვების, ბრძოლის ველზე ცეცხლის მხარდამჭერის, ნაღმსატყორცნების გადამზიდის და სხვა ვარიანტებს. როგორც ჩანს რუსეთის თავდაცვის სამინისტრო გეგმავს რუსული არმიის სწრაფი რეგირების და განლაგების ბრიგადების აღჭურვას, რაც მსგავსია ამერიკული Stryker ბრიგადების.

ტექნიკურ-ტაქტიკური მახასიათებლები:

შეიარაღებაში შესვლის წელი: 2015 (2016)
ეკიპაჟი: 3 კაცი
დესანტი: 9 ჯარისკაცი
წონა: 15~20 ტ
სიგრძე: ~8 მ
სიგანე: ~3 მ
სიმაღლე: ~3 მ
ძირითადი შეიარაღება: 30 მმ ქვემეხი
ტანკსაწინააღდეგო რაკეტები: Kornet-M (4 ერთეული)
მეორადი შეიარაღება: 1×7.62 მმ ან 1×12.7 მმ ტყვიამფრქვევები
ქვემეხის ჭურვების მარაგი: 500 ცალი
ტყვიამფრქვევების ვაზნების მარაგი: 2000 ცალი
საწვავის ტიპი: დიზელი
ძრავის სიმძლავრე: ~500 ცხ/ძ
მაქს.სიჩქარე გზაზე: ~100 კმ/სთ
წყალში გადაადგილების სიჩქარე: ~10 კმ/სთ
მოქმედების დიაპაზონი: ~800 კმ
აღმართს დაძლევა: 60%
გვერდითი დახრილობის დაძლევა: 40%
ვერტ.წინაღობის დაძლევა: ~0.6 მ
თხრილის გადალახვა: ~2 მ
ფორსირება: ამფიბიური

ლექსო ლომაშვილი

მასალის გამოყენება ავტორის ნებართვის გარეშე აკრძალულია

You may also like...