გენერალ-ლეიტენანტი ფრედერიკ ბენ ჰოჯესი „ღირსეული პარტნიორის“ წვრთნა მოინახულა.
გენერალ-ლეიტენანტი ფრედერიკ ბენ ჰოჯესი „ღირსეული პარტნიორის“ წვრთნა მოინახულა.
05.08.2017
საქართველოში ვიზიტით მყოფი ევროპაში აშშ-ის არმიის სარდალი სწავლების „ღირსეული პარტნიორი 2017“-ის მიმდინარეობას პირადად გაეცნო. ვაზიანის პოლიგონზე სასწავლო პროცესის მონახულებამდე, გენერალ-ლეიტენანტ ფრედერიკ ბენ ჰოჯესს მრავალეროვნული სწვალების შტაბში გენერალური შტაბის უფროსის პირველმა მოადგილემ, პოლკოვნიკმა ნიკოლოზ ჯანჯღავამ და სახმელეთო სწავლების ხელმძღვანელმა, პოლკოვნიკმა შავლეგო ტაბატაძემ უმასპინძლეს.
ამერიკელ გენერალს სპეციალურად გამართულ ბრიფინგზე პოლკოვნიკმა შავლეგო ტაბატაძემ სწავლების გეგმა წარუდგინა და ქვედანაყოფების ჩართულობის, მათი როლის, გამოყენებული ტექნიკის შესახებ ინფორმაცია მიაწოდა.
მოგვიანებით, ევროპაში აშშ-ის არმიის სარდალმა საწვრთნელი ველები დაათვალიერა და ყველა მონაწილე ქვეყნის სამხედრო მოსამსახურეებს გაესაუბრა. მან სწავლების მიმდინარეობა დადებითად შეაფასა.
გენერალ-ლეიტენანტი ფრედერიკ ბენ ჰოჯესი საქართველოს სწავლების „ღირსეული პარტნიორი 2017“-ის ფარგლებში ჩამოვიდა. საქართველო ბოლო ქვეყანაა, სადაც ამერიკელი გენერალი ევროპაში აშშ-ის არმიის სარდლის რანგში ვიზიტს ახორციელებს. სტუმარს თავდაცვის მინისტრი და გენერალური შტაბის უფროსი უკვე შეხვდნენ.
გენერალ-ლეიტენანტი ფრედერიკ ბენ ჰოჯესი – ევროპაში აშშ-ის არმიის სარდალი:
„ვაზიანში ვიზიტის დროს ჩემზე სამმა რაღაცამ მოახდინა შთაბეჭდილება. პირველ რიგში, მინდა გითხრათ, რომ რომ გასულ წელთან შედარებით, საწვრთნელი ტერიტორიების ხარისხი საგრძნობლად გაუმჯობესებულია, სამუშაო, რაც მათ განახორციელეს, ნამდვილად ადასტურებს, რომ ქართველმა და ამერიკელმა სამხედრო მოსამსახურეებმა სწავლების ორგანიზების კუთხით, პროგრესს მიაღწიეს. უნდა აღინიშნოს ის სერიოზული მიდგომა, რასაც ქართველი ჯარისკაცები იჩენენ. მათ ყველაფერი გააკეთეს იმისათვის, რომ სწავლების სცენარი კარგად წარმოედგინათ. შთაბეჭდილება მოახდინეს საკუთრივ ჩემმა ჯარისკაცებმა სხვადასხვა ქვედანაყოფიდან. ისინი ინტენსიურად მუშაობდნენ 6 კვირის განმავლობაში, გრძელი გზა გაიარეს გერმანიიდან ვაზიანამდე, მათ შეინარჩუნეს ენერგია და მზადყოფნის მაღალი დონე.“
