დაპირისპირება ვეტერანების საქმეთა სახელმწიფო სამსახურში

ჟურნალ “ვეტერანის” ყოფილი რედაქტორი ზაირა მიქატაძე ვეტერანების საქმეთა სახელმწიფო სამსახურის  საზოგადოებასთან ურთიერთობის განყოფილების უფროსს შორენა სიხარულიძეს შევიწროებაში, ფსიქოლოგიური ძალადობის  განხორცილებაში და შეურაცხყოფის მიყენებაში ადანაშულებს.

დღეს ვეტერანების საქმეთა სახელმწიფო სამსახურთან საპროტესტო აქცია გაიმართა. ამავე სამსახურის თანამშრომელმა,  ჟურნალ ვეტერანის  „რედაქტორმა“, ზაირა მიქატაძემ და ადვოკატმა ზაზა ხატიაშვილმა, “ვეტერანების საქმეთა სახელმწიფო სამსახურის საზოგადოებასთან ურთიერთობის განყოფილების უფროსის, შორენა სიხარულიძის მიერ ზაირა მიქატაძეზე განხორციელებული შევიწროების, ფსიქოლოგიური ძალადობისა და შეურაცხყოფის ფაქტები” გააპროტესტეს. 

ზაირა მიქატაძე აფხაზეთის ომის ვეტერანია, იგი ოთხი წელია აღნიშნულ უწყებაში მუშაობს. როგორც იგი აცხადებს, სიხარულიძე  თანამდებობაზე ნეპოტიზმითაა დანიშნული და ამიტომაც მას ხელშეუხებლობის განცდა აქვს.

„ხუთი თვეა, რაც ჩვენს სამსახურში მუშაობს. ამ ხნის განმავლობაში მან სხვადასხვა თანამშრომელთან რამდენჯერმე სცადა კონფლიქტის გაჩაღება, მაგრამ ყველამ იცის, რომ გავლენიანი კაცის მოყვანილია და მასთან დაპირისპირებას ყველა ერიდება.  იგი შეურაცხმყოფელი სიტყვებით მოიხსენიებს იმ ვეტერანებსაც, რომლებიც სამსახურის მიმართ გულისწყრომას გამოხატავენ. ხოლო განსხვავებული აზრის მქონე თანამშრომლებს გაფუჭებით ემუქრება.ამ ხნის განმავლობაში ბევრჯერ სცადა ჩემთან დაპირისპირება და საწადელსაც მიაღწია. მან საკუთარ ფეისბუქგვერდზე გამოაქვეყნა ჩემი ღირსებისა და პატივის შემლახველი პოსტი, სადაც  მიწოდა „ღორი“, „სულით როსკიპი“, „ტვინგარღვეული“, „ავადმყოფი, რომელსაც ფსიქორეაბილიტაციაც არ შველის“. იმ პერიოდში, როდესაც მასთან უსიამოვნება მომიხდა, მართლაც ვიმყოფებოდი ნევროპათოლოგის მკურნალობის ქვეშ, რაც სიხარულიძემ საქილიკოდ აქცია“, – აცხადებს მიქატაძე gmas.ge-ისთან საუბარში.

მისი თქმით, ადამიანი, რომელსაც ასე ესმის კოლეგებთან და ვეტერანებთან ურთიერთობა, საზოგადოებასთან ურთიერთობის სამსახურს არ უნდა ხელმძღვანელობდეს. დღევანდელ აქციაზე მიქატაძეს, ადვოკატ ხატიაშვილს, ომში დაღუპულ მეომართა დედებსა და ოჯახის წევრებს სამსახურის დირექტორი მოადგილესთან, ჯანდრი უბირიასთან და უწყების სხვა თანამშრომლებთან ერთად შეხვდა. მან დაადასტურა, რომ სიხარულიძე მართლაც უღირსად მოიქცა, რისთვისაც მის მიმართ შესაბამისი ზომები იქნება გატარებული. ჯანდრი უბირიას თქმით კი ეს არის ქალებს შორის ჩხუბი.

ზაირა მიქატაძის თქმით, თუკი შორენა სიხარულიძეს სამსახურიდან  არ გაათავისუფლებენ, 20 სექტემბერს იგი შიმშილობას გამოაცხადებს.  დღეს ზაირა მიქატაძის მხარდამჭერი აქციები გაიმართა ოზურგეთსა და ბათუმშიც, სადაც  ვეტერანებმა  საქართველოს პრემიერ-მინისტრს, მამუკა ბახტაძეს ღიად მიმართეს, დაინტერესდეს ვეტერანების საქმეთა სახელმწიფო სამსახურში არსებული მდგომარეობით, რომელსაც მათი თქმით,  ვეტერანთა  ყოფა-ცხოვრება უარესობისკენ მიჰყავს.

p.s gmas.ge ადმინისტრაცია სრულ მხარდაჭერას უცხადებს აფხაზეთის ომის ვეტერანს,სამხედრო ჟურნალისტს, ჟურნალ “ვეტრანის” ყოფილ  რედაქტორს ქალბატონ ზაირა მიქატაძეს და მოუწოდებს ვეტერანთა სახელმწიფო სამსახურის დირექტორს ბრიგადის გენერალს ბატონ ვლადიმერ იმნაძეს გაატაროს ქმედითი ღონისძიებები და უზრუნველყოს    ქალბატონ ზაირა მიქატაძის უფლებების დაცვა.

You may also like...

კომენტარის დატოვება