ლევან იზორია: „ჩვენ კანონს ვერ შევეწინააღმდეგებით, ამიტომ გამოსავალს საკანონმდებლო ცვლილებებში ვხედავთ“
ლევან იზორია: „ჩვენ კანონს ვერ შევეწინააღმდეგებით, ამიტომ გამოსავალს საკანონმდებლო ცვლილებებში ვხედავთ“
„მხოლოდ კანონის დაცვა იყო მაქსიმალური პრიორიტეტი და სწორედ კანონის დაცვის პირობებში, გამჭვირვალობისა და არა დისკრიმინაციის პირობებში ჰქონდა შესაძლებლობა აღნიშნულ პიროვნებას მიეღო მონაწილეობა ტენდერებში“ – ლევან იზორიამ განმარტება იმ ტენდერებთან დაკავშირებით გააკეთა, რომელშიც რუსეთის სასარგებლოდ ჯაშუშობისთვის გასამართლებული პირის, პეტრე დევრიშაძის კომპანიამ გაიმარჯვა. თავდაცვის მინისტრობის კანდიდატს შეკითხვა საქართველოს პარლამენტში გამართულ გაერთიანებული კომიტეტების სხდომაზე დაუსვეს.
ლევან იზორიას განცხადებით, აღნიშნულმა პიროვნებამ მონაწილეობა მიიღო ელექტრონულ, ანუ ღია სახის ტენდერში და მისი ვინაობის წინასწარ ცოდნა შეუძლებელი იყო. „იმ კრიტერიუმებს, თუ ვინ უნდა მიიღოს მონაწილეობა ელექტრონულ, ღია ტენდერებში განსაზღვრავს კანონი და არა მე, ან ადმინისტრაციული ორგანო. შესაბამისად, საჯარო მოხელეს, მათ შორის, მინისტრსაც აქვს სწორედ, კანონით განსაზღვრული ე.წ. როგორც ნეგატიური, ისე პოზიტიური ვალდებულება. ამ შემთხვევაში, ელექტრონული ტენდერების მიმართ ეს არის ნეგატიური ვალდებულება, რაც გამოიხატება იმაში, რომ არ უნდა ჩაერიოს ელექტრონულ ტენდერში და არ უნდა იცოდეს წინასწარ, თუ ვინ იღებს მონაწილეობას. წინააღმდეგ შემთხვევაში ეს იქნება კანონის უხეში დარღვევა და სისხლის სამართლებრივ პასუხისმგებლობას გამოიწვევს“, – აღნიშნა ლევან იზორიამ.
მისი განმარტებით, პოზიტიური ვალდებულება საიდუმლო ტენდერებთან მიმართებაში გულისხმობს, რომ როგორც მინისტრს, ასევე ცალკეულ სახელმწიფო ორგანოს აქვს ვალდებულება, იცოდეს ვინ იღებს ტენდერში მონაწილეობას.
აღნიშნული ტიპის ტენდერში კი, დევრიშაძეს მონაწილეობა არ მიუღია. „სახელმწიფო უსაფრთხოების ინტერესებიდან გამომდინარე, საიდუმლო შესყიდვების დროს სახელმწიფო უსაფრთხოების სამსახური გასცემს გარკვეულ ნებართვებს და ზღუდავს ცალკეულ სუბიექტებს. მთავრობის დადგენილებით ხდება სიის განსაზღვრა, თუ ვის აქვს საიდუმლო შესყიდვებში მონაწილეობის უფლება“, – აღნიშნა ლევან იზორიამ.
„მე პირადად და ჩვენს გუნდს გვაქვს გარკვეული უხერხულობა, როდესაც ჯაშუშობაში ან სხვა ტიპის დანაშაულში მსჯავრდებულს აქვს შესაძლებლობა კანონის დაცვით მიიღოს მონაწილეობა ტენდერებში“, – აღნიშნა მან.
„ამ საკითხზე უკვე გავეცი სპეციალური დავალება, მოვიძიეთ საერთაშორისო პრაქტიკის გარკვეული მასალა და საუკეთესო პრაქტიკის გათვალისწინებითა და ჩვენი სამხედრო ატაშეების მხარდაჭერით, გვინდა გარკვეული შეზღუდვების ინიცირება მოვახდინოთ, მათ შორის, ელექტრონული ტენდერის ფარგლებში, ცალკეული სუბიექტებისთვის და კომპანიებისთვის, რათა შემდგომში ეს უხერხულობა და ხარვეზი ერთად გამოვასწოროთ“, -განაცხადა ლევან იზორიამ.
