იუნკერების საწყისი საბრძოლო მომზადების კურსი
2017 წლის ერთიანი ეროვნული გამოცდებისა და აკადემიის შიდა ტურების წარმატებით გავლის შემდეგ, ეროვნული თავდაცვის აკადემიის სასწავლო ბატალიონში ბაკალავრიატის საგანმანათლებლო პროგრამებზე ჩაირიცხა 72 იუნკერი. აკადემიაში ჩარიცხვის შემდეგ, პირველი კურსის იუნკერებმა გაიარეს ოთხკვირიანი საწყისი საბრძოლო მომზადების კურსი, რომელიც მოიცავდა თეორიულ და პრაქტიკულ მეცადინეობებს. აღნიშნული კურსი მიზნად ისახავს ახალწვეული სამოქალაქო პირების სამხედრო მოსამსახურეებად გარდაქმნას. კურსის განმავლობაში იუნკერები დაეუფლნენ სამხედრო მოსამსახურის ჩამოყალიბებისთვის საჭირო უნარ-ჩვევებს. პირველი ეტაპი დაეთმო თეორიულ სწავლებას, რომელიც იუნკერებმა ეროვნული თავდაცვის აკადემიაში გაიარეს. მათ შეისწავლეს აკადემიაში ქცევის, ცხოვრების, ზემდგომებთან და ერთმანეთთან ურთიერთობის წესები, გაეცნენ სადისციპლინო წესდებასა და სამხედრო ხელოვნების ისტორიას. ასევე საწყისი საბრძოლო მომზადების კურსის განმავლობაში ინდივიდუალურ დონეზე შეისწავლეს საიჟინრო მომზადება და პირველადი სამედიცინო დახმარება. მეორე ეტაპი მოიცავდა საწყის საცეცხლე მომზადებას, რომლის დროსაც იუნკერებმა შეისწავლეს იარაღის გამოყენების, სროლისა და უსაფრთხოების წესები, მათ ასევე ჩაუტარდათ პრაქტიკული სროლის სავარჯიშოები M4-ის ავტომატური შაშხანიდან. საწყისი საბრძოლო მომზადების კურსის განმავლობაში იუნკერებს უწევდათ რთულ ფიზიკურ და ფსიქოლოგიურ პირობებთან შეგუება. თუმცა არსებული გამოწვევების მიუხედავად საწყისი საბრძოლო მომზადების კურსი წარმატებით დაასრულა 58 იუნკერმა. ოთხი კვირის განმავლობაში მათ ღირსეულად გადალახეს სიძნელეები და დაეუფლნენ სამხედრო მოსამსახურისათვის საჭირო უნარ-ჩვევებს.
