NATO, ალბათ, ვაზიანს აირჩევს

sam1ჩრდილოატლანტიკური ალიანსის შემფასებელი ჯგუფის საქართველოში სტუმრობა დასრულდა

ჯერ გადაწყვეტილი არ არის, სად აშენდება საქართველო-NATO-ს ერთობლივი წვრთნისა და შეფასების ცენტრი, თუმცა, გასულ კვირას სამდღიანი ვიზიტით მყოფმა NATO-ს შემფასებელთა ჯგუფმა რამდენიმე სავარაუდო ადგილი მოინახულა და ისინი თავიანთ მოსაზრებებს უახლოეს პერიოდში გააცნობენ ქართველ სამხედროებს.
ალიანსის შემფასებელთა ჯგუფს, რომელშიც დანიის, ნორვეგიის, ლიტვისა და ლატვიის სამხედროები შედიოდნენ, საშუალება მიეცა, დაეთვალიერებინა ეროვნული სასწავლო ცენტრის – “კრწანისის” – და ვაზიანის სამხედრო აეროდრომის მიმდებარე ტერიტორია, სასროლეთი და პოლიგონი.

მიუხედავად იმისა, რომ ცენტრის მშენებლობა ჯერ არც დაწყებულა, საქართველოს თავდაცვის სამინისტროში იმედი აქვთ, რომ ერთობლივი წვრთნისა და შეფასების ცენტრი წლის ბოლოს გაიხსნება. ცენტრის მიზანი იქნება ბატალიონის დონის დანაყოფის გაწვრთნა და მათი საბრძოლო შესაძლებლობების შეფასება. აქ შეიძლება მომზადდნენ როგორც ქართული არმიის, ისე NATO-ს წევრი და პარტნიორი ქვეყნების სამხედრო დანაყოფები.

მომავალი ცენტრის მშენებლობისთვის ადგილი, ალბათ, თბილისთან ახლოს შეირჩევა, კონკრეტულად კი ვაზიანში, სამხედრო აეროდრომის სიახლოვეს. ეს აეროდრომი, რომელიც საბჭოთა პერიოდიდან თითქმის აღარ ფუნქციონირებს, სამხრეთ კავკასიაში ერთ-ერთი ყველაზე დიდია, კაპიტალური რემონტის შემდეგ კი მას სტრატეგიული მნიშვნელობაც მიენიჭება.

ერთობლივი

წვრთნისა და შეფასების ცენტრის ასეთი აეროდრომის გვერდით განთავსება მეტად ხელსაყრელი იქნება. ეს გააადვილებს წვრთნებში მონაწილე სამხედრო დანაყოფების ტრანსპორტირებას.
ცენტრის ადგილსამყოფლის საბოლოო განსაზღვრისა და მშენებლობის დაწყების შემდეგ მოსალოდნელია, გაძლიერდეს რუსეთის ხელისუფლების პოლიტიკური ზეწოლა იმ მოტივით, რომ NATO საქართველოში თავის სამხედრო ბაზას აშენებს, მაგრამ ყველას უნდა შევახსენოთ, რომ ერთობლივი წვრთნისა და შეფასების ცენტრი მხოლოდ სასწავლო დაწესებულება იქნება და მას საბრძოლო მოქმედებებში მონაწილეობა არ დაევალება.

error: სტატიის დაკოპირება აკრძალულია!!!