ნოემბერი 29, 2022

Gmas.ge

ქართული სამხედრო ანალიტიკური პორტალი

ქართულ-ამერიკული სწავლება „ღირსეული პარტნიორი 2016“ დასრულდა (ვიდეო)

ქართულ-ამერიკული სწავლება „ღირსეული პარტნიორი 2016“ დასრულდა ( ვიდეო)

24.05.2016

13246148_1215074105191996_2553257741566273941_o

ქართულ-ამერიკული სამხედრო სწავლება „ღირსეული პარტნიორი 2016“ დასრულდა. ვაზიანის სასროლეთზე ქართველმა, ამერიკელმა და ბრიტანელმა სამხედროებმა ერთობლივი ოპერაცია წარმოადგინეს. დასკვნით საჩვენებელ სწავლებას საქართველოს თავდაცვის მინისტრი თინათინ ხიდაშელი, საქართველოს შეიარაღებული ძალების გენერალური შტაბის უფროსი, გენერალ-მაიორი ვახტანგ კაპანაძე, ამერიკის შეერთებული შტატების არმიის ევროპული ჯარების სარდალი, გენერალ-ლეიტენანტი ფრედერიკ ბენ ჰოჯესი, ნატოს ევროპული ძალების უმაღლესი მთავარსარდლის მოადგილე, გენერალ სერ ადრიან ბრედშოუ და სხვა მაღალი რანგის სტუმრები დაესწრნენ.

„ყოველი ასეთი სწავლება ქართული შეიარაღებული ძალების ნატოსთან, ცალსახად და ერთმნიშვნელოვნად, სულ უფრო მეტი სიახლოვის გარანტია. თუმცა, შეიარაღებული ძალების სიახლოვე არ არის საკმარისი და ამ პროცესს სჭირდება პოლიტიკური კონსენსუსი. ის ფაქტი, რომ ჩვენ დღეს აქ, ამ მოედანზე საქართველოში გვყავდა წარმოდგენილი ქართული ასეული, რომელიც უკვე ოფიციალურად ნატოს ასეულია, იმის დასტურია, რომ ჩვენ ამ ერთი წლის განმავლობაში ფუნდამენტური ნაბიჯები გადავდგით და ძალიან წინ წავედით. მაგრამ, კიდევ ერთხელ ვამბობ, საბოლოო გადაწყვეტილებას სჭირდება 28-ს შორის კონსენსუსი, რაც მხოლოდ და მხოლოდ იმაზე არ არის დამოკიდებული, რამდენად ძლიერი, მომზადებული და თავსებადი იქნება ჩვენი შეიარაღებული ძალები,“ – აღნიშნა თინათინ ხიდაშელმა.

საჩვენებელ სწავლებაში ერთობლივი, გაძლიერებული ოცეულის დონის დანაყოფი, 1 ამერიკული M1A2 ტიპის ტანკი „ABRAMS“, ერთი ქვეითთა საბრძოლო მანქანა „M2 BRADLEY“, T-72 ტიპის ტანკი და ქვეითთა საბრძოლო მანქანა БМП 2 მონაწილეობდა. სცენარის მიხედვით, პირობით მოწინააღმდეგეზე პირველი იერიში სნაიპერებმა მიიტანეს. მოწინააღმდეგეზე იერიში ქართულმა ავიაციამაც მიიტანა. მოწინააღმდეგის პოზიციები ქართულ შეიარაღებაში არსებულმა СU-25-მა დაბომბა. საავიაციო იერიშის შემდეგ მოწინააღმდეგეზე შეტევა არტილერიამ და ჯავშანსატანკო დანაყოფებმა განახორციელეს. საჩვენებელი ოპერაცია ქვეითთა შეტევით დასრულდა.

საჩვენებელი სწავლების დასრულების შემდეგ ქართულ-ამერიკული სწავლების „ღირსეული პარტნიორი 2016”-ის ფარგლებში სწავლების მონაწილეთა დაჯილდოების ცერემონიალი გაიმართა. საქართველოს თავდაცვის მინისტრმა თინათინ ხიდაშელმა და გენერალური შტაბის უფროსმა, გენერალ-მაიორმა ვახტანგ კაპანაძემ აშშ-ისა და დიდი ბრიტანეთისა და ჩრდილოეთ ირლანდიის გაერთიანებული სამეფოს 24 სამხედრო მოსამსახურეს უწყებრივი მედლები „ქაქუცა ჩოლოყაშვილი“ გადასცეს. აშშ-ის ჯორჯიის შტატის მედლებით დაჯილდოვდნენ ქართველი ოფიცრებიც. დაჯილდოების ცერემონიალს და საჩვენებელ სწავლებას საქართველოში აშშ-ისა და ჩრდილოეთ ირლანდიის გაერთიანებული სამეფოს ელჩები იან კელი და ალექსანდრა ჰოლ ჰოლი დაესწრნენ. ვაზიანის სასროლეთზე იმყოფებოდნენ ასევე, საქართველოს საკანონმდებლო და აღმასრულებელი ხელისუფლების წარმომადგენლები.

ქართულ-ამერიკული სწავლება „ღირსეული პარტნიორი 2016“ საქართველოში წელს მეორედ ჩატარდა და ქართული ასეულის ნატოს სწრაფი რეაგირების ძალებში (NRF) მონაწილეობისთვის მზადყოფნის ამაღლებასა და თანამშრომლობის გაღრმავებას, სტაბილურობის, თავდაცვა/შეტევით ოპერაციებში უნარ–ჩვევების გაუმჯობესებას, ასევე აშშ-ის, დიდი ბრიტანეთისა და საქართველოს შეიარაღებული ძალების ურთიერთთავსებადობის გაძლიერებას ისახავდა მიზნად.

სწავლების სცენარი სტაბილურობის, შეტევა/თავდაცვის ოპერაციებს ემყარებოდა. ქართულ-ამერიკული სწავლებაში 1300 სამხედრო მოსამსახურე მონაწილეობდა – მათ შორის 500 ქართველი, აშშ-ის არმიის ევროპული სარდლობის 650 და დიდი ბრიტანეთისა ჩრდილოეთ ირლანდიის გაერთიანებული სამეფოს 150 სამხედრო მოსამსახურე.

პირველად საქართველოს შეიარაღებული ძალების ისტორიაში, სწავლებაში M1A2 ტიპის ამერიკულ ტანკები „აბრამსები“ მონაწილეობდნენ. წვრთნაში ჩართული იყო ასევე ქვეითთა საბრძოლო მანქანები „ბრედლები”, სამედიცინო საევაკუაციო და სამეთაურო-საშტაბო ჯავშანმანქანები, ჰამერის ტიპის ჯიპები, C-130 ტიპის ამერიკული სამხედრო თვითმფრინავები და სხვა აღჭურვილობა. სწავლებაში მონაწილეობდა IV მექანიზირებული ბრიგადის მე-12 მსუბუქი ქვეითი ბატალიონის „ალფა“ ასეული, რომელმაც ნატოს შეფასების II დონე წარმატებით დაასრულა და ნატოსთან სრულად თავსებადი გახდა. დანაყოფს მომდევნო სამი წლის განმავლობაში, საჭიროების შემთხვევაში, ნატოს სწრაფი რეაგირების დანიშნულებით გამოიყენებენ.

error: სტატიის დაკოპირება აკრძალულია!!!