აგვისტო 10, 2022

Gmas.ge

ქართული სამხედრო ანალიტიკური პორტალი

გერმანული ხელის ტანკსაწინააღმდეგო ყუმბარსატყორცნი Panzerfaust 3

გერმანული ხელის ტანკსაწინააღმდეგო ყუმბარსატყორცნი Panzerfaust 3

04.08.2017

Panzerfaust 3 (Pzf 3) არის მესამე თაობის, პორტატული გერმანული ტანკსაწინააღმდეგო ყუმბარსატყორცნი, რომლის შექმნის ისტორიას მეორე მსოფლიო ომის ერაში მივყავართ. უახლესი გერმანული ყუმბარსატყორცნის შორეულ წინაპარს ლეგენდარული Panzerfaust-ი წარმოადგენდა, რომლის ანგარიშზეც  მოწინააღმდეგის უამრავი განადგურებული ტანკია, ხოლო Panzerfaust 3-ის უშაულო წინამორბედი მეორე თაობის ყუმბარსატყორცნი Pzf-44 Lanze-ი იყო.

ახალი გერმანული ტანკსაწინააღმდეგო ყუმბარსატყორცნის შემუშავება 1978 წელს დაიწყო, მას დროებითი სახელი – Panzerfaust 60/100 ეწოდა (რიცხვები, რომლებიც იარაღის სახელწოდებაში ფიგურირებდა, ყუმბარსატყორცნის გამშვები მილისა და კუმულაციურქობინიანი ყუმბარის კალიბრს აღნიშნავდა, შესაბამისად). ახალი ყუმბარსატყორცნის წარმოება, შეზღუდული რაოდენობით,  1985 წელს დაიწყო, ხოლო მასიური წარმოებაში ის 1990-იანი წლების დააწყისში ჩაეშვა. ყუმბარსატყორცნის საბაზსო ვერსიის ათვისება გერმანიის არმიის – ბუნდესვერის მიერ  1992 წელს დაიწყო. იარაღი, გერმანიის გარდა, შეიარაღებაში ასევე მიიღო შვედეთის, ავსტრიის, იტალიისა და რამდენიმე სხვა ქვეყნის შეიარაღებულმა ძალებმა.

ტანკსაწინააღმდეგო ყუმბარსატყორცნის საბაზისო ვარიანტის მიხედვით, მისმა მწარმოებელმა  კომპანიამ –  Dynamit-Nobel AG-იმ, Panzerfaust 3-ის  მრავალი გაუმჯობესებული ვერსია შექმნა და წარმოებაშიც ჩაუშვა. Pzf 3-ის ამუნიცია, გრმანიის გარდა ლიცენიზიით ორ ქვეყანაში: შვეიცარიასა და სამხრეთ კორეაში იწარმოება. 2000 წლის მონაცემებით კომპანია Dynamit Nobe-ს მეოთხედ მილიონ ერთეულზე მეტი Pzf 3-ის ტიპის ტანკსაწინააღმდეგო ყუმბარსატყორცნი ჰქონდა წარმოებული.

Pzf 3 სამი საბაზისო ნაწილისაგან შედგება – ყუმბარისაგან, რომელიც გამშვებ მილზე ქარხანაშივე მონტაჟდება, უშუალოდ გამშვები მილისაგან და ცეცხლის მართვის მოდულისაგა. ცეცხლის მართვის მოდული მრავალჯერადი გამოყენებისაა, გასროლის შემდეგ  მას ხნიან გამშვები მილიდან, ხოლო თავად გამშვებ მილს, რომელიც ერთჯერადი გამოყენებისაა, უბრალოდ, აგდებენ.

ყუმბარსატყორცნის გამშვები მიილის დიამეტრი 60 მმ-ის ტოლია, თუმცა ყუმბარის დიამეტრი შესაძლოა 110 მილიმეტრიც კი იყოს, რადგან ყუმბარა გამშვებ მილში წინიდან მაგრდება, და ისევე როგორც საბჭოთა РПГ-7-ში, მისი საბრძოლო ქობინიც მილის გარეთ არის გამოწეული.

ყუმბარსატყორცნი გასროლების მრავალფეროვნებით გამოირჩევა. Panzerfaust 3 ერთჯერადი გამშვებ მილში რაკეტა, გამომგდები მუხტი და ანტიმასა (ანტიმასის როლს იარაღში მეტალის ფხვნილი ასრულებს) ქარხანაშივე იდება. გამშვები მოწყობილობიდან რაკეტის გასროლას გამომგდები მუხტი ახდენს, როდესაც რაკეტა მსროლელისაგან უსაფრთხო მანძილზე, რამდენიმე ათეულ მეტრის სიშორეზე აღმოჩნდება  ირთვება რაკეტული ძრავა, რომელიც ყუმბარას მაქსიმალურ 115 მ/წმ აჩქარებას ანიჭებს. ყუმბარსატყორცნის სროლის მაქსიმალურ ეფექტურ მანძილად 600 მეტრი მიიჩნევა.

თავდაპირველად Panzerfaust 3-ის კუმულაციური ქობინით აღჭურვილი ყუმბარების მაქსიმალური ჯავშანშეღწევადობა 400 მილიმეტრს არ აღემატებოდა, რაც დინამიკური დაცვის ელემენტებითა და კომპოზიტური ჯავშნით დაცული იმ დროისათვის თანამედროვე Т-72-ისა და Т-80-ის ტიპის ტანკების ჯავშნის გასახვრეტად არასაკმარისი იყო. სწორედ ამის გამო,  მოგვიანებით კომპანია Dynamit-Nobel-მა Pzf 3-T-ს ტიპის ტანდემურად განთავსებული ორი კუმულაციური ქობინით აღჭურვილი ყუმბარა შეიმუშავა, რომელიც დინამიკური დაცვით აღჭურვილი ტანკების წინააღმდეგ გამოიყენება. მისი პირველი ქობინი დინამიკური დაცვის ელემენტის აფეთქებას იწვევს, ხოლო მეორე და ძირითადი ქობინი კი ტანკის დაუცველად დარჩენილ მთავარ ჯავშანს არღვევს. ამ ტიპის ყუმბარას 700 მილიმეტრის სისქის მონოლითური ფოლადის ჯავშნის გარღვევა შეუძლია, დინამიკური დაცვის გადალახვის შემდეგ

Panzerfaust 3-ის  უახლეს ტანკსაწინააღმდეგო ყუმბარას წარმოადგენს Pzf 3-IT600, რომელსაც ასევე ტანდემუად განთავსებული ორი ქობინი გააჩნია. პირველ ქობინს შეწევა-გამოწევის უნარი აქვს, ანუ თუ ყუმბარა დინამიკური დაცვის ელემენტებით აღჭურვილი სამიზნისაკენ მიემართება, მაშინ  პირველი ქობინი წინ არის გამოწეული და ძირითად ქობინს დინამიკური დაცვისაგან გზას უთავისუფლებს, ხოლო თუკი გასროლა მცირედ შეჯავშნული სამიზნის ან შენობის მიმართულებით ხდება, მაშინ ის ძირითად ქობინში ჩაწეული რჩება, სამიზნეზე მოხვედრისას კი ორივე მათგანი ერთდროულად ფეთქდება, რითაც ძლიერდება აფეთქების ეფექტი,  წარმოიქმნება გაცილებით მეტი ნამსხვრევი და შედეგად ცოცხალი ძალის განადგურების შანსიც იმატებს. Pzf 3-IT600-ის ჯავშანშეღწევადობა, დინამიკური დაცვის გადალახვის შემდეგ, 900 მილიმეტრს შეადგენს.

ბუნკერებისა და სხვა ტიპის გამაგრებული სამიზნეების გასანადგურებლად კომპანია Dynamit-Nobel-მა შეიმუშავა ყუმბარა სახელწოდებით Bunkerfaust-3, რომელსაც შეღმწევ-მსხვრევადი ქობინით არის აღჭურვილი. მის დანიშნულებას ბუნკერებსა და მცირედ შეჯავშნულ ჯავშანტექნიკაში გამაგრებული თუ მყოფი ცოცხალი ძალის განადგურება წარმოადგენს. მისი ქობინი შეყონებული მოქმედების ამფეთქით არის აღჭურვილი და ბუნკერის კედელში ან ჯავშანტექნიკაში შეღწევის შემდეგ, მცირედი დაყოვნებით ფეთქდება. Bunkerfaust-3-ს 17 მმ-ის სისქის ჯავშნის ან 360 მმ-ის სისქის აგურის კედლის გარღვევა შეუძლია.

ცეცხლის მართვის/დამიზნების მოდიული დასაკეცი კონდახისაგან და ასევე ორი დასაკეცი სახელურისაგან შედგება, რომელთაგან ერთ-ერთ ყუმბარსატყორცნის წინა, ხოლო მეორე უკანა მხარეს, სასხლეტთან არის განთავსებული. იარაღის გამშვებ დანადგარს აქვს მექანიკური სასხლეტი და უსაფრთხოების ღილაკი, მის სტანდარტულ ვერსიას ასევე აქვს ტელესკოპური სამიზნეც.

ყუმბარსატყორცნის ცეცხლის მართვის სისტემის  ბოლო მოდიფიკაცია, რომელიც ცნობილია როგორც  Dynarange, აღჭურვილია ლაზერული მანძილმზომითა და ბალისტიკური კომპიუტერით.

ძირითადი მოდიფიკაციები:

მოდიფიკაცია PzF 3

სტანდარტული ტანკსაწინააღმდეგო ვერსია კუმულაციური საბრძოლო ქობინით

  • კალიბრი:
    • გამშვები მილი: 60 მმ
    • ქობინი: 110 მმ
  • წონა:
    • საბრძოლო მდგომარეობაში: 15.2 კგ
    • ქობინი: 3.9 კგ
    • ყუმბარა: 12.8 კგ
  • სიგრძე: 1.230 მმ
  • ყუმბარის საწყისი სიჩქარე: 160.0 მ/წმ
  • უმაღლესი შესაძლო სიჩქარე: 243.0 მ/წმ
  • სამიზნე: ტელესკოპური
  • მაქსიმალური ეფექტური მანძილი:
    • სტაციონარული სამიზნისთვის: 400.0 მ
    • მოძრავი სამიზნისთვის: 300.0 მ
  • მინიმალური ეფექტური მანძილი: 20.0 მ
  • ჯავშანშეღწევადობა:
    • მონოლითურ ფოლადის ჯავშანში: 700 მმ
    • რკინა-ბეტონში: 1.600 მმ
  • მწარმოებელი: Dynamit-Nobel-ი, გერმანია

მოდიფიკაცია PzF 3-IT

გაუმჯობესებული ტანკსაწინააღმდეგო ვერსია ტანდემურად განთავსებული ორი კუმულაციური ქობინით. შექმნილია სპეციალურად დინამიკური დაცვით დაცული ტაკების წინააღმდეგ.

  • კალიბრი:
    • გამშვები მილი: 60 მმ
    • ქობინი: 110 მმ
  • წონა:
    • საბრძოლო მზადყოფნაში: 15.6 კგ
    • ქობინი: 3.9 კგ
    • ყუმბარის: 13.3 კგ
  • სიგრძე: 1.200 მმ
  • საწყისი სიჩქარე: 152.0 მ/წმ
  • უმაღლესი შესაძლო სიჩქარე: 220.0 მ/წმ
  • სამიზნე: ტელესკოპური
  • მაქსიმალური ეფექტური მანძილი:
    • უძრავი სამიზნეებისათვის: 400.0 მ
    • მოძრავი სამიზნისათვის: 300.0 მ (600.0 მ DYNARANGE-ს ტიპის  სამიზნით)
  • მინიმალური ეფექტური მანძილი: 20.0 მ
  • ჯავშანშეღწევადობა:
    • მონოლითურ ფოლადის ჯავშანში: 900 მმ
  • მწარმოებელი: Dynamit-Nobel-ი, გერმანია

მოდიფიკაცია PzF 3 Bunkerfaust

შექმნილია გამაგრებული ბუნკერების, მსუბუქად შეჯავშნული და შეუჯავშნავი  სამიზნეების გასანადგურებლად.

  • კლიბრი:
    • გამშვები მილი: 60 მმ
    • ქობინი: 110 მმ
  • წონა:
    • ყუმბარსტყორცნის საბრძოლო მდგომარეობაში: 15.6 კგ
    • ქობინი: 3.9 კგ
    • ყუმბარა: 13.3 კგ
  • სიგრძე: 1.200 მმ
  • საწყისი სიჩქარე: 149.0 მ/წმ
  • უმაღლესი შესაძლო სიჩქარე: 212.0 მ/წმ
  • სამიზნე: ტელესკოპური
  • მაქსიმალური ეფექტური მანძილი: 300.0 მ
  • მინიმალური ეფექტური მანძილი: 20.0 მ
  • მწარმოებელი: Dynamit-Nobel-ი, გერმანია
  • ჯავშანშეღწევადობა:
    • მონოლითურ ფოლადის ჯავშანში: 110 მმ
    • რკინა-ბეტონში: 360 მმ
    • სილიან ტომრებში: 1.300 მმ

IMG_20170730_125447220

ადმინისტრატორი გერმანული ხელის ტანკსაწინააღმდეგო ყუმბარსატყორცნი Panzerfaust 3-ით ხელში  #Noble Partner 2017 ვაზიანის სამხედრო აეროდრომი.29.07.2017

error: სტატიის დაკოპირება აკრძალულია!!!