ისრაელმა “ქართული ინტერესების დათმობისთვის” რუსული “სამადლობელი” მიიღო..
ისრაელმა 2018 წლის 11 ივლისს გოლანის მაღლობების თავზე საზენიტო “პეტრიოტის” რაკეტით უპილოტო სადაზვერვო თვითმფრინავი ჩამოაგდო. ეს ფაქტი, ერთი შეხედვით, არაორდინარული და სენსაციური არ უნდა მოგვეჩვენოს, იმის გათვალისწინებით, რომ ისრაელმა ერაყისა და სირიის ატომური რეაქტორები დაბომბა და დღესაც, როცა მოესურვება, წერტილოვან სარაკეტო დარტყმებს აყენებს ასადის რეჟიმის სამხედრო ობიექტებს. მაგრამ სენსაციური ან, თუ გნებავთ, კურიოზულიც ის არის, რომ ჩამოგდებული უპილოტო ისრაელში დამზადებული ნაწილებით იყო აწყობილი და უფრო მეტიც – მასზე იყო რუსული წარწერები.
გამოდის, რომ ისრაელმა ჩამოაგდო სირიის ჰმეიმის სამხედრო აეროდრომიდან აფრენილი რუსული სადაზვერვო უპილოტო საფრენი აპარატი “ფორპოსტი”, რომელიც ებრაული შეარცჰერ Mკ II-ის რუსულ კლონს წარმოადგენს.როგორ მოხვდა ებრაული უპილოტოები რუსული არმიის შეიარაღებაში?
შეიძლება ძნელი დასაჯერებელი იყოს, მაგრამ ეს თემა უშუალოდ უკავშირდება საქართველოსა და ათი წლის წინანდელ აგვისტოს ომს.
ჩვენდა სამწუხაროდ, ასეც მოხდა – ისრაელმა საქართველოსთან სამხედრო-ტექნიკური თანამშრომლობა შეწყვიტა. ყოფილმა პრეზიდენტმა მიხეილ სააკაშვილმა ერთხელ საქვეყნოდ მიანიშნა, რომ აფხაზეთის თავზე ქართული “ჰერმესების” ჩამოყრის შესაძლებლობა რუს სამხედროებს მას შემდეგ მიეცათ, რაც ისრაელიდან ამ უპილოტოების დისტანციურად მართვის კოდები მიიღეს…
ამა წლის 11 ივლისს გოლანის მაღლობებთან ჩამოგდებული რუსული სადაზვერვო “ფორპოსტიც” ამ პარტიის იყო.
ვინ დარჩა მოგებული საქართველოს საწინააღმდეგო რუსეთ-ისრაელის საიდუმლო მოლაპარაკებით?
რა თქმა უნდა, მოსკოვი, ორი ძირითადი მიზეზით:
პირველი -კრემლმა 2015 წელს ირანს მაინც მიჰყიდა C-300 ტიპის საზენიტო-სარაკეტო სისტემები, რაც სათუოს ხდის ისრაელის შესაძლო საჰაერო დარტყმების წარმატებულ შედეგს.
მეორე – ისრაელს ერთ მილიონდოლარიანი საზენიტო “პეტრიოტით” უწევს თავისივე უპილოტოს ჩამოგდება, რომელიც რუსეთს მიჰყიდა.
ათი წლის წინ ისრაელმა პატარა საქართველოსთან სამხედრო თანამშრომლობას დიდ რუსეთთან გარიგება არჩია და მოსალოდნელი შედეგიც მიიღო.
წყარო: კვირის პალიტრა,ირაკლი ალადაშვილი.
