სახელმწიფო დეპარტამენტი – საქართველოს მთავრობას შესწევს უნარი, გამოავლინოს, შეაკავოს და რეაგირება მოახდინოს ტერორიზმის შემთხვევებზე
სახელმწიფო დეპარტამენტი – საქართველოს მთავრობას შესწევს უნარი, გამოავლინოს, შეაკავოს და რეაგირება მოახდინოს ტერორიზმის შემთხვევებზე
ამის შესახებ ნათქვამია ამერიკის შეერთებული შტატების სახელმწიფო დეპარტამენტის ანგარიშში, რომელიც ტერორიზმის შესახებ 2017 წლის პერიოდს ეხება. ყოველწლიურ ანგარიშში მსოფლიოს სხვადასხვა ქვეყნებთან ერთად, შეფასებულია საქართველოს მიერ განხორციელებული ღონისძიებები ტერორიზმის წინააღმდეგ ბრძოლის კუთხით.
„საქართველო, როგორც „ისლამური სახელმწიფოს“ წინააღმდეგ ბრძოლის გლობალური კოალიციის დიდი ხნის წევრი, განაგრძობდა ამერიკის შეერთებულ შტატებთან მჭიდრო თანამშრომლობას ტერორიზმის წინააღმდეგ ბრძოლის მთელ რიგ საკითხებზე. მან მონაწილეობა მიიღო მრავალ ორმხრივ წვრთნაში და რჩება ამერიკის შეერთებული შტატების მტკიცე პარტნიორად უსაფრთხოების სფეროში. მაისში, აშშ-ისა და საქართველოს ხელმძღვანელმა პირებმა ხელი მოაწერეს „ამერიკის შეერთებული შტატების მთავრობასა და საქართველოს მთავრობას შორის საიდუმლო ინფორმაციის დაცვის უსაფრთხოების ზომების შესახებ“ შეთანხმებას, რითიც შექმნეს სამართლებრივი საფუძველი ინფორმაციის ორმხრივად გაზიარებისთვის, რაც გააძლიერებს ტერორიზმის წინააღმდეგ ბრძოლის სფეროში თანამშრომლობას და გაზრდის საქართველოს სამხედრო თავსებადობას ჩრდილოატლანტიკური ხელშეკრულების ორგანიზაციის (ნატო) წევრ სახელმწიფოებთან.
2017 წელს, საქართველომ განაგრძო კონტრტერორისტული კანონმდებლობის გაძლიერება. საქართველომ მიიღო კანონმდებლობა ფარული საგამოძიებო მოქმედებების და ელექტრონული თვალთვალის ღონისძიებების გამოყენების რეფორმირებისა და მართვის ზედამხედველობის გაზრდის მიზნით. 2017 წელს, პარლამენტმა მიიღო სხვა ცვლილებები, რომელთა შორის იყო სამართალდამცავი ორგანოებისათვის ელექტრონული კომუნიკაციის მონაცემების თვალთვალის განმახორციელებელი სააგენტოსგან პირდაპირ გამოთხოვის უფლებამოსილების მინიჭება და ასევე, სისხლის სამართლის საქმის მონაწილე პირების უსაფრთხოების დაცვის გაძლიერება. მთავრობამ ასევე, მოახდინა „საერთაშორისო დაცვის შესახებ“ ახალი კანონის იმპლემენტაცია. კანონი შემუშავებული იქნა იმგვარად, რომ მთავრობას შეეძლოს უარი უთხრას ლტოლვილის სტატუსზე, თავშესაფარზე ან სხვა საერთაშორისო დაცვაზე იმ პირებს, რომელთა მიმართაც არსებობს საკმარისი საფუძველი ვარაუდისათვის, რომ ჩართულნი იყვნენ ტერორისტულ აქტში და/ან აქვთ კავშირი ტერორისტულ ორგანიზაციასთან.
მთლიანობაში, საქართველოს მთავრობას ზოგადად შესწევს უნარი გამოავლინოს, შეაკავოს და რეაგირება მოახდინოს ტერორიზმის შემთხვევებზე. საქართველოს სახელმწიფო უსაფრთხოების სამსახური არის წამყვანი უწყება ტერორიზმთან დაკავშირებულ ინციდენტებზე რეაგირების კუთხით და ზოგადად არის კარგად აღჭურვილი და მომზადებული“, – ნათქვამია ანგარიშში.
