სექტემბერი 25, 2022

Gmas.ge

ქართული სამხედრო ანალიტიკური პორტალი

საქართველოს თავდაცვის ძალების მე-12 ბატალიონმა „მტკიცე მხარდაჭერის“ სამშვიდობო მისია 43-ე ბატალიონისგან ოფიციალურად გადაიბარა.

დღეიდან I ქვეითი ბრიგადის მე-12 ბატალიონი ავღანეთში მიმდინარე მისიის ფარგლებში ბაგრამის საავიაციო ბაზის უსაფრთხოების დაცვის ამოცანას 7 თვის განმავლობაში შეასრულებს.
უფლებამოსილების გადაბარების ცერემონიალი ბაგრამის საავიაციო ბაზაზე გაიმართა. საავიაციო ბაზის მეთაურმა, ბრიგადის გენერალმა ბრაიან ვოლფორდმა 43-ე ბატალიონის ჯარისკაცებს გაწეული სამსახურისთვის მადლობა პირადად გადაუხადა და აღნიშნა, რომ ქართველმა სამხედროებმა სამშვიდობო მისია მაღალ დონეზე შეასრულეს და მათ მხარდამხარ სამსახური საამაყოა.

სამშვიდობო მისიის ოფიციალური გადაბარების ცერემონიალზე შესრულდა საქართველოს, აშშ-ის და ავღანეთის ეროვნული ჰიმნები. ღონისძიების დასასრულს დაჯილდოების ცერემონიალი გაიმართა. ავღანეთში საქართველოს თავდაცვის ძალების უფროსმა სამხედრო წარმომადგენელმა, პოლკოვნიკმა ზაქარია კალანდაძემ, თავდაცვის ძალების სამხედრო წარმომადგენლობის სერჟანტმა, მთავარმა სერჟანტმა გიორგი გოგოჭურმა და 43-ე ბატალიონის მეთაურმა, ვიცე-პოლკოვნიკმა ლაშა დავითაძემ 43-ე ბატალიონის სამხედრო მოსამსახურეები და ქართული სამეკავშირეო ჯგუფის ამერიკელი საზღვაო ქვეითები სამშვიდობო მისიის მედლებითა და სხვადასხვა სიმბოლური საჩუქრებით დააჯილდოვეს. საქართველოს თავდაცვის მინისტრის ბრძანებით კი, 43-ე ბატალიონის მეთაური, ვიცე-პოლკოვნიკი ლაშა დავითაძე უწყებრივი მედლით „სამშობლოსათვის თავდადებული“ დაჯილდოვდა.

უფლებამოსილების გადაბარების ოფიციალურ ცერემონიალს ბაგრამის საავიაციო ბაზაზე დისლოცირებული სხვადასხვა ქვეყნის სამხედრო მაღალჩინოსნები და სამოქალაქო პირები დაესწრნენ.

error: სტატიის დაკოპირება აკრძალულია!!!