თებერვალი 5, 2023

Gmas.ge

ქართული სამხედრო ანალიტიკური პორტალი

საქართველოს ტერიტორიულ წყლებში ნატო-ს ხომალდები შემოვიდნენ

საქართველოს ტერიტორიულ წყლებში ნატო-ს ხომალდები შემოვიდნენ. ვიზიტის ფარგლებში, ნატო-ს მუდმივმოქმედი მეორე საზღვაო შენაერთის მეთაური, კომოდორი ბაუდევაინ ბუტსი საქართველოს სანაპირო დაცვის ხელმძღვანელს შეხვდება. ასევე, გაიმართება სამუშაო შეხვედრები, კულტურული და სპორტული ღონისძიებები.

ნატო-ს მუდმივმოქმედი მეორე საზღვაო შენაერთის ხომალდები და საქართველოს სანაპირო დაცვის ორი ხომალდი – „დიოსკურია“ და „ოჩამჩირე“ ერთობლივ წვრთნებს ჩაატარებენ. მასში მონაწილეობას ასევე მიიღებენ ნიდერლანდების, თურქეთის, რუმინეთისა და ბულგარეთის მცურავი საშუალებები.

წვრთნების მიზანია, საქართველოსა და ნატო-ს საზღვაო ძალების ურთიერთქმედების და ურთიერთთავსებადობის ამაღლება.

ფოთის პორტში სტუმრებს დახვდნენ სანაპირო დაცვის დეპარტამენტის დირექტორი, პოლონეთის ელჩი საქართველოში, ადგილობრივი თვითმმართველობისა და ნატო-ს სამეკავშირეო ოფისის წარმომადგენლები.

„ის, რომ ძალის გამოყენებით შეცვალა საზღვრები რუსეთმა, ჩვენთვის მიუღებელია და სწორედ აქტიური აგრესიულობის გათვალისწინებით, რასაც რუსეთი ახორციელებს, გავზარდეთ ჩვენი წამომადგენლობა შავი ზღვის რეგიონში. ჩვენი მიზანია, გავაძლიეროთ ურთიერთობები საქართველოსთან. წარსულშიც ვატარებდით წვრთნებს საქართველოს საზღვაო ძალებთან და ამას მომავალშიც ვგეგმავთ“, – განაცხადა ნატო-ს მუდმივმოქმედი მეორე საზღვაო შენაერთის მეთაურმა, კომოდორმა ბაუდევაინ ბუტსმა.

ნატო-ს მუდმივმოქმედი მეორე საზღვაო შენაერთის (SNMG2) ხომალდები საქართველოს ტერიტორიულ წყლებს 4 აპრილს დატოვებენ.

წყარო: 1tv.ge ავტორი – თეა აბსარიძე 

error: სტატიის დაკოპირება აკრძალულია!!!