ავღანეთში ქართველმა სამხედროებმა კიდევ ერთხელ გამოიჩინეს თავი

8 აპრილს, ავღანეთის ისლამურ რესპუბლიკაში, ადგილობრივი დროით 17:30 საათზე, ბაგრამის საავიაციო ბაზის სიახლოვეს თალიბები „მტკიცე მხარდაჭერის“ მისიის ჯავშანკოლონას დაესხნენ თავს. ჩვენი წყაროს მტკიცებით, აშკარა იყო, რომ შეტევა კარგად გახლდათ ორგანიზებული, რადგან თვითმკვლელი ტერორისტის მიერ მანქანის აფეთქებას კოლონაზე თალიბების ქვეითი ჯგუფების შეტევაც მოჰყვა. ამას გარდა, სათანადოდ იყო შერჩეული თავდასხმის ადგილიც, რამაც გააძლიერა მოულოდნელობის ეფექტი და ტერორისტებს შედეგის მიღწევაში ხელი შეუწყო.
თვითმკვლელის მოქმედების შედეგად კოლონაში მყოფი ამერიკული ჯავშანმქანქანა „მაქსპრო“ აალდა. დაუზუსტებელი ინფორმაციით, ოთხი დაღუპულიდან სამი სწორედ ამ მანქანაში იჯდა.
აღსანიშნავია ქართველი სამხედროების ოპერატიული და თამამი მოქმედება. 22-ე ბატალიონის სწრაფი რეაგირების ასეულის სამხედროებმა, კოლონაში მყოფ სხვა ამერიკელებთან ერთად, თალიბებს ცეცხლითვე უპასუხეს. სწორედ ქართველი ჯარისკაცების გამბედავი მოქმედებების წყალობით გადარჩნენ აფეთქებულ „მაქსპროში“ მსხდომი ამერიკელები. საერთო ჯამში, ბრძოლა ორ საათზე მეტხანს გაგრძელდა. ამერიკელებისა და ქართველების გარდა, ტერორისტებთან ბრძოლაში ჩაერთვნენ ავღანეთის არმიის სახმელეთო და საავიაციო ჯგუფებიც.
“გულწრფელად ვლოცულობ იმ ამერიკელთა ოჯახებისთვის, რომელთა წევრებიც ბაგრამთან ახლოს დაიღუპნენ და ვგმობ ამ საშინელ ტერორისტულ აქტს. ამერიკელმა სამხედროებმა ავღანეთში სიცოცხლე გაწირეს ჩვენი უსაფრთხოებისთვის და ტერორისტების ასეთი მხდალი მოქმედებები ვერ შეუშლის ხელს ჩვენს საბოლოო მიზანს, დავამყაროთ მშვიდობა,“ – დაწერა ამერიკის სახელმწიფო მდივანმა მაიკ პომპეომ ტვიტერის საკუთარ გვერდზე.
კომენტარი გააკეთა საქართველოს თავდაცვის მინისტრმა ლევან იზორიამაც. მისი თქმით: “სამწუხაროდ გუშინ ტრაგიკული ინციდენტი მოხდა. მინდა, მივუსამძიმრო დაღუპულთა ოჯახებს. ამასთან, მინდა განვაცხადო, რომ ამ ინციდენტის შედეგად ქართველი სამხედროები არ დაშავებულან. ეს არის საპასუხისმგებლო მისია და ხედავთ, თუ რამხელა საფრთხესთან უწევთ გამკლავება ქართველ სამხედროებს და მათ პარტნიორებს”.
აღსანიშნავია, რომ ISAF-ის დასრულების შემდეგ ამერიკელთა შორის დანაკარგების ოდენობა მკვეთრად შემცირებულია. 2001 წლის ნოემბრიდან 2014 წლის 31 დეკემბრამდე, ანუ მისიის ცხელი ფაზის დასრულებამდე, ავღანეთში 2400-მდე ამერიკელი სამხედრო დაიღუპა. 2018 წელს ავღანეთში დანაკარგი 13 სამხედრო იყო, 2019-ში კი, გუშინდელის ჩათვლით, უკვე 7 მსხვერპლია.
აქვე გეტყვით, რომ “მტკიცე მხარდაჭერის” მისიის დაწყების შემდეგ, 22-ე ბატალიონის სამხედროებს მეორედ დასჭირდათ მსგავს სიტუაციაში ბრძოლაში ჩართვა და ამერიკელი თანამებრძოლების დახმარება. პირველად ეს 2015 წლის 21 დეკემბერს მოხდა. ქართველმა სამხედროებმა მაშინ, იმავე ბაგრამის ბაზასთან ახლოს, 6 ამერიკელის სიცოცხლე იხსნეს.