დუშეთის მუნიციპალიტეტის საკრებულომ, სოფელ მაღაროსკარში უსახელო ქუჩას აფხაზეთის ომში დაღუპული ბატალიონ „თეთრი არწივის“ მებრძოლის, ნიკოლოზ თურმანაულის სახელი მიანიჭა.

დუშეთის მუნიციპალიტეტის საკრებულომ 2019 წლის 6 სექტემბერს გამართულ სხდომაზე მიიღო N36 განკარგულება-დუშეთის მუნიციპალიტეტის მაღაროსკარის ადმინისტრაციული ერთეულის სოფელ მაღაროსკარში უსახელო ქუჩისთვის აფხაზეთის ომში დაღუპული ნიკოლოზ თურმანაულის სახელის მინიჭების შესახებ.

აღნიშნული განკარგულების თანახმად: დუშეთის მუნიციპალიტეტის მაღაროსკარის ადმინისტრაციული ერთეულის სოფელ მაღაროსკარში მდაბარე უსახელო ქუჩას მიენიჭა აფხაზეთის ომში დაღუპული ნიკოლოზ თურმანაულის სახელი, თანდართული რუკის მიხედვით.

დუშეთის მუნიციპალიტეტის საკრებულოს მაღაროსკარის ადმინისტრაციული ერთეულის სოფელ მაღაროსკარში მდაბარე უსახელო ქუჩისთვის აფხაზეთის ომში დაღუპული “თეთრი არწივის” ბატალიონის მებრძოლის ნიკოლოზ თურმანაულის სახელის მინიჭების შესახებ საკრებულოს წევრმა (მაღაროსკარის მაჟორიტარმა ) ხვიჩა გოგოლაურმა მიმართა.

საკრებულოს წევრის ინიციატივამ – „გეოგრაფიული ობიექტის სახელდების“ შესახებ დუშეთის მუნიციპალიტეტის საკრებულოში და საქართველოს რეგიონული განვითარებისა და ინფრასტრუქტურის სამინისტროს გეოგრაფიული ობიექტების სახელწოდებათა დადგენის, ნორმალიზების, გამოყენების, რეგისტრაციის, აღრიცხვისა და დაცვის მიზნით, გეოგრაფიული ობიექტების სახელწოდებათა სფეროში მოქმედი სამთავრობო კომისიაში საქართველოს მთავრობის 2015 წლის 1 ივნისის N239 დადგნილებით-„მუნიციპალიტეტის ადმინისტრაციულ საზღვრებში მდებარე გეოგრაფიული ობიექტების სახელდების წესის დამტკიცების შესახებ“ გათვალისწინებული პროცედურები გაიარა.

„სამშობლოს დაცვისას დაღუპულთა და ომის შემდეგ გარდაცვლილ მეომართა ხსოვნის უკვდავყოფის შესახებ“ საქართველოს კანონის მე-2 მუხლის „ვ“ პუნქტის თანახმად: სამშობლოს დაცვისას დაღუპულისა და ომის შემდეგ გარდაცვლილი მეომრის ხსოვნის უკვდავყოფის ერთ-ერთი ფორმაა სამშობლოს დაცვისას დაღუპულისა და ომის შემდეგ გარდაცვლილი მეომრის სახელისა და გვარის დარქმევა ქუჩისათვის, მოედნისათვის, დაწესებულებისათვის, სკოლისათვის, აგრეთვე – სამხედრო ნაწილისა და გემისათვის, რომლებმაც განსაკუთრებით გამოიჩინეს თავი საბრძოლო ოპერაციების ჩატარების დროს.

„მუნიციპალიტეტის ადმინისტრაციულ საზღვრებში მდებარე გეოგრაფიული ობიექტების სახელდების წესის დამტკიცების შესახებ“ საქართველოს მთავრობის 2015 წლის 1 ივნისის N239 დადგნილების მე-7 მუხლის 15-ე პუნქტის თანახმად; მუნიციპალიტეტის საკრებულოს მიერ გეოგრაფიული ობიექტის სახელდების თაობაზე გადაწყვეტილების მიღების შემთხვევაში, შესაბამისი სამართლებრივი აქტი რეაგირებისთვის ეგზავნება მუნიციპალიტეტის აღმასრულებელ ორგანოს, რომელიც შესაბამისი სამართლებრივი აქტის მიღებიდან 4 თვის ვადაში უზრუნველყოფს კონკრეტული ღონისძიებების გატარებას (აბრების, ფირნიშების, რუკების (არსებობის შემთხვევაში), ცნობარების და სხვ. დამზადება, კორექტირება, გავრცელება და სხვ.).

ნიკოლოზ თურმანაული დაიბადა 1973 წლის 20 მაისს დუშეთის რაიონის სოფელ მაღაროსკარში. დაამთავრა მაღაროსკარის საშუალო სკოლა. საქართველოს შეირაღებულ ძალებში ნიკოლოზ თურმანაული გაიწვიეს 1993 წლის მარტში.

აფხაზეთის ომის დროს იბრძოდა თავდაცვის სამინისტროს 1-ელი მობილური ძალების ყოფილი ს/ნ 43323 (სადესანტო მოიერიშე) „თეთრი არწივის“ ბატალიონის შემადგენლობაში.

მონაწილეობა აქვს მიღებული 1993 წლის 2 ივლისს გადმოსხმული რუსული დესანტის განადგურებაში. ასევე, ლაბრაში, ტამისშში, კინდღში, აძუბჟაში წარმოებულ საბრძოლო მოქმედებებში.