ლევან იზორიასა და პედრო სერანოს ერთობლივი განცხადებები
“საგარეო ქმედებათა სამსახურის ერთიანი უსაფრთხოებისა და თავდაცვის პოლიტიკის მიმართულებით გენერალური მდივნის მოადგილის ვიზიტი საქართველოში მკაფიო გზავნილია როგორც ჩვენთვის, ასევე საერთაშორისო საზოგადოებისათვის, რომ ქვეყნაში რეფორმების პროცესი წარმატებით მიმდინარეობს და სხვა მიმართულებებთან ერთად, თავდაცვისა და უსაფრთხოების სფეროში საქართველოსთან თანამშრომლობას ევროკავშირი უდიდეს მნიშვნელობას ანიჭებს,” – განაცხადა საქართველოს თავდაცვის მინისტრმა ლევან იზორიამ მედიის წარმომადგენლებთან ევროკავშირის საგარეო ქმედებათა სამსახურის გენერალური მდივნის მოადგილესთან ერთიანი უსაფრთხოების, თავდაცვის პოლიტიკისა და კრიზისების მართვის საკითხებში პედრო სერანოს საქართველოში ვიზიტთან დაკავშირებით.
პედრო სერანომ კი, ევროკავშირსა და საქართველოს შორის არსებულ ურთიერთობას მეგობრული უწოდა და მთავარი გზავნილი მედიის წარმომადგენლებთან გააჟღერა: „ევროკავშირი მხარს უჭერს საქართველოს ტერიტორიულ მთლიანობასა და სუვერენიტეტს“. მან ხაზგასმით აღნიშნა საქართველოს წვლილი ევროკავშირის ეგიდით მიმდინარე მისიებში: „საქართველოს ძალიან დიდი წვლილი შეაქვს ევროკავშირის ეგიდით მიმდინარე მისიებში, მათ შორის ცენტრალური აფრიკის რესპუბლიკაში. ძალიან ვაფასებთ საქართველოს თავდაცვის ძალების სამხედრო მოსამსახურეების მხარდამხარ მსახურს ევროკავშირის ქვეყნების თავდაცვის ძალების სამხედრო მოსამსახურეების გვერდით ცენტრალური აფრიკის რესპუბლიკაში. ძალიან მნიშვნელოვანია საქართველოს წვლილი ევროკავშირის წევრ ქვეყნებთან ერთად სტაბილურობის უზრუნველყოფის საქმეში,“ – განაცხადა პედრო სერანომ მედიის წარმომადგენლებთან.
