ფორე მოსულიშვილი 28 წლის ქართველი გმირი, რომელმაც საკუთარი სიცოცხლის ფასად იტალიაში 16 ადამიანი გადაარჩინა
1944 წლის 3 დეკემბრის გამთენიისას სოფელ კოლონიას ბოლოს, „მოტტა როსსას“ გორაკზე მდებარე ერთ პატარა ქოხში ღამის გასათევად შეფარებული პარტიზანთა ერთი ჯგუფი ალყაში აღმოჩნდა. იქ მყოფი ჩვიდმეტი პარტიზანიდან შვიდი ქართველი იყო, დანარჩენები კი იტალიელები. გააფთრებულ შეტაკებაში ბევრი გერმანელი დაიღუპა, მაგრამ პარტიზანებიდან ფორე და კიდევ ორი კაცი დაიჭრა, ამასთან ვაზნებიც შემოელიათ. ფაშისტები მეთაურის დანებებას მოითხოვდნენ, დანარჩენებს კი სიცოცხლის შენარჩუნებას პირდებოდნენ. ფორე არ იყო რაზმის მეთაური, მაგრამ გერმანელებთან გავიდა და განაცხადა, რომ ის იყო მეთაური, ტყვეობას კი სიკვდილს არჩევდა. იმ წამსვე იარაღი ამოიღო და თავი მოიკლა.
იტალიის მთავრობამ არ დაივიწყა ფორე მოსულიშვილის თავგანწირვა და 1970 წელს გამოსცა დეკრეტი მისთვის ოქროს მედლის „მხედრული მამაცობისთვის” გადაცემის შესახებ. ამ მედლის კავალერი იტალიის ეროვნულ გმირად მიიჩნევა და გენერალიც კი ვალდებულია პირველი მიესალმოს მედლის მფლობელ ჯარიკაცს
ფორეს დაჯილდოების მოტივაციაში ნათქვამია: „ქართული ჯგუფის უნტერ–ოფიცერმა გერმანულ არმიას გამოსტაცა სამოცდაათამდე თანამემამულე სრული შეიარაღებითა და აღჭურვილობით. როგორც პარტიზანი შედიოდა იტალიურ მოქმედ შენაერთებთან ლომბარდიაში, სადაც თავი გამოიჩინა სამხედრო ნიჭითა და თავისუფლებისადმი რწმენით. სასტიკი თავდაცვითი აქციისას, თავისი ქვედანაყოფიანად ალყაში მოქცეულმა, გრძელი და სისხლიანი ბრძოლის შემდეგ, როცა საბრძოლო მასალა სრულიად ამოეწურათ და მტერი მოითხოვდა, რომ ყველას სიცოცხლეს შეუნარჩუნებდა, თუკი მეთაური დანებდებოდა, მან სტიქიურად და გმირული ჟესტით შეცვალა თავისი მეთაური. იმავდროულად, უცაბედად, მან პისტოლეტი ამოიღო და საფეთქელში დაიხალა ბოლო ტყვია, შეძახილით: „გაუმარჯოს პარტიზანებს! გაუმარჯოს იტალიის თავისუფლებას!“.
იტალიის ელჩმა ფედერიკო სენსიმ თავის გამოსვლაში აღნიშნა: „ ქართველო მეგობრებო! თქვენ უნდა ამაყობდეთ, რომ ამ გმირს თქვენმა ქვეყანამ აწოვა ძუძუ, მისმა სახელოვანმა საგმირო საქმეებმა კიდევ უფრო განადიდა საქართველოს სახელი. ეს გმირობა უფრო მეტად განამტკიცებს იმ მრავალსაუკუნოვან ტრადიციულ კავშირ–ურთიერთობას, რომელიც საქართველოსა და იტალიას აერთიანებს“.
აღსანიშნავი რომ ფორე მოსულიშვილმა მანამდეც არაერთი საგმირო საქმე ჩაიდინა რის გამოც დიდი შენაერთის მეთაურობა შესთავაზეს, მაგრამ უარი განაცხადა – ადგილმდებარეობას კარგად არ ვიცნობ და არც იტალიური ვიციო..
