რუსი ექსპერტი – თუ სომხეთისთვის დახმარებაში საქართველო ხელს შეგვიშლის, ჰაერსაწინააღმდეგო საშუალებები უნდა გავუნადგუროთ.
მთიან ყარაბაღში მიმდინარე საომარი მოქმედებების თაობაზე რუსი ექსპერტები აცხადებენ, რომ სომხეთისთვის რუსეთის მიერ სამხედრო დახმარების აღმოჩენა საქართველოს გამო გართულებულია.
სამხედრო მეცნიერებათა დოქტორი კონსტანტინე სივკოვს მიაჩნია, რომ ამ შემთხვევაში რუსეთმა საქართველოს ჰაერსაწინააღმდეგო საშუალებები უნდა გაანადგუროს, ვინაიდან საქართველო თავისი ტერიტორიის გავლით არც საჰაერო, არც სახმელეთო გზით რუსული სამხედრო ტვირთების გატარებას არ დათანხმდება.
„საქართველოს მოქმედების შედეგად სომხეთი სრულ იზოლაციაში აღმოჩნდა. კასპიის ზღვის და ირანის ტერიტორიის გავლით სომხეთისთვის სამხედრო ტვირთების მიწოდება საკმაოდ გართულებულია“ – განაცხადა ექსპერტმა გამოცემა „ვზგლიადთან“ ინტერვიუში.
ამასთანავე ექსპერტი იმედოვნებს, რომ რუსეთს საქართველოსთან ომის დაწყება არ დასჭირდება და მთიანი ყარაბაღის კონფლიქტის მოგვარება დიპლომატიური გზით და გიუმრის სამხედრო ბაზაზე დისლოცირებული რუსული სამხედრო შენაერთების მეშვეობით შესაძლებელი გახდება.
შეგახსენებთ, რომ 27 სექტემბრიდან მთიან ყარაბაღში და მოსაზღვრე რაიონებში აზერბაიჯანულ და სომხურ შეიარაღებულ ძალებს შორის ბრძოლა მიმდინარეობს. ორივე მხრიდან არიან დაღუპულები და დაჭრილები.
