თიანეთში ზურაბ იარაჯულის ხსოვნას ადგილობრივი მუნიციპალიტეტის და თავდაცვის სამინისტროს წარმომადგენლებმა პატივი მიაგეს.
მიმდინარე წლის 12 მარტს საქართველოს ეროვნულ გმირს, მფრინავ ზურაბ იარაჯულს 49 წელი შეუსრულდებოდა…
როგორც თიანეთის მუნიციპალიტტის მერიის პრესამსახურის მიერ გავრცელებულ ინფორმაციაშია აღნიშნული ამ დღესთან დაკავშირებით, ეროვნული გმირის ხსოვნას პატივი მიაგეს ადგილობრივი ხელისუფლებისა და საქართველოს თავდაცვის სამინისტროს სამხედრო-საჰაერო ძალების წარმომადგენლებმა – ყვავილების გვირგვინით შეამკეს ზურაბ იარაჯულის საფლავი და მისივე სახელობის მემორიალი.
ზურაბ იარაჯულის სახელობის სკვერში შეკრებილ საზოგადოებას – ზურას ოჯახის წევრებს, ნათესავებს, მეგობრებსა და თანასოფლელებს, სიტყვით მიმართა თიანეთის მუნიციპალიტეტის მერმა თამაზ მეჭიაურმა და ისაუბრა სამშობლოს წინაშე ეროვნული გმირის დამსახურებაზე. გმირის ხსოვნას პატივი მიაგო პოეტმა ტარიელ ხარხელაურმა.
თიანეთისა და ფშავ-ხევსურეთის ეპისკოპოსმა მიქაელმა, დეკანოზ გიორგი ბერბერაშვილთან ერთად, ზურას საფლავზე მისი სულის მოსახსენიებელი პანაშვიდი გადაიხადა. სპეციალურად ამ დღისთვის, ეროვნული გმირის ხსოვნის პატივის მისაგებად სოფელ ზარიძეებში ჩამობრძანდა დმანისისა და ლორე-ტაშირის ეპარქიის მთავარეპისკოპოსი, დიდი ბრიტანეთისა და ირლანდიის მთავარეპისკოპოსი ზენონი (ერისკაცობაში იმედა იარაჯული).
საქართველოს პრეზიდენტის 2013 წლის 14 აგვისტოს განკარგულებით, სამშობლოს დაცვისა და ერთიანობისათვის ბრძოლაში გამოჩენილი მამაცობის, თავდადებისა და გმირობისათვის საქართველოს შეიარაღებული ძალების სამხედრო-საჰაერო ძალების მოიერიშე საავიაციო ესკადრის მფრინავს, უფროს ლეიტენანტ ზურაბ იარაჯულს სიკვდილის შემდეგ მიენიჭა საქართველოს ეროვნული გმირის წოდება და დაჯილდოვდა ეროვნული გმირის ორდენით.
