საქართველოში შეერთებულმა შტატებმა საზღვაო და საჰაერო ინფრასტრუქტურა უნდა განალაგოს – ამერიკელი გენერალი

ამერიკის შეერთებულმა შტატებმა საქართველოში საჰაერო და საზღვაო, სამხედრო ინფრასტრუქტურა უნდა გაზარდოს. ამის შესახებ ევროპაში ამერიკული სახმელეთო ჯარების ყოფილმა მეთაურმა, გენერალ-ლეიტენანტმა ბენ ჰოჯესმა გამოცემა “Europe Time”-ს განაცხადა.

ჰოჯესის თქმით, აშშ-გან საჭიროა იმის დემონსტრირება, რომ ეს რეგიონი მათთვის მნიშვნელოვანია და აგრძელებენ თანამშრომლობას უსაფრთხოების მიმართულებით.

„ეს ყველაზე მთავარი სტრატეგიული საკითხია. აისახება თუ არა მთიან ყარაბაღში რუსეთის გამოჩენა იმ დერეფანზე, რომელიც ევროპას ევრაზიასთან დააკავშირებს. დიდი ალბათობით, რუსი სამხედროების ყოფნა ამ პროექტებისთვის საფრთხის შემცველი იქნება. გარდა ამისა, იზრდება სომხეთში არსებული რუსული სამხედრო ბაზის მნიშვნელობა, შესაბამისად, საქართველომ და მისმა პარტნიორებმა, მაგალითად, აშშ-მა, ამას ყურადღება უნდა მიაქციონ. კარგი იქნება, თუ აშშ საქართველოში თავის სამხედრო ინფრასტრუქტურას გაზრდის, განსაკუთრებით საჰაერო და საზღვაო კომპონენტში. ეს დიდი სახელმწიფოების შეჯიბრების ნაწილია. საჭიროა იმის დემონსტრირება, რომ ეს რეგიონი ჩვენთვის მნიშვნელოვანია და ჩვენ გავაგრძელებთ თანამშრომლობას უსაფრთხოების მიმართულებით“, – აცხადებს ჰოჯესი.

მას შემდეგ, რაც მთიან ყარაბაღში რუსი სამშვიდობოები განლაგდებიან, რა ბედი ელის იმ სტრატეგიულ სატრანზიტო პროექტებს, რომლებიც საქართველოს საშუალებით დასავლეთს აღმოსავლეთთან აკავშირებდა? გამოცემის მიერ დასმულ ამ კითხვას გენერალ-ლეიტენანტმა ხაზგასმით უპასუხა, რომ აშშ-მა ღიად უნდა აჩვენოს ყველას, რამდენად მნიშვნელოვანია მისთვის კავკასიის რეგიონი.

შეგახსენებთ, 10 ნოემბერს სომხეთის პრემიერ-მინისტრმა ნიკოლ ფაშინიანმა მთიან ყარაბაღში საომარი მოქმედებების შეწყვეტა გამოაცხადა. სომხეთის პრემიერის განცხადებით, მან შესაბამის შეთანხმებას ხელი რუსეთისა და აზერბაიჯანის პრეზიდენტებთან ერთად მოაწერა. რუსეთის პრეზიდენტმა, ვლადიმერ პუტინმა განაცხადა, რომ სომხეთი და აზერბაიჯანი მთიან ყარაბაღში რუსი მშვიდობისმყოფელების განლაგებაზე შეთანხმდნენ.

აღსანიშნავია, რომ დღეს თურქეთის საგარეო საქმეთა მინისტრმა ევლუთ ჩავუშოღლუმ განაცხადა, რომ ყარაბაღის გარდა რეგიონში არის სხვა პრობლემებიც, მაგალითად როგორიცაა, საქართველო, ყირიმი, მოლდოვა, სირია, ლიბია და იემენი. მისი თქმით, ყველა რეგიონული პრობლემა მხოლოდ პოლიტიკური გზებით უნდა გადაწყდეს.

error: სტატიის დაკოპირება აკრძალულია!!!