ნოემბერი 29, 2022

Gmas.ge

ქართული სამხედრო ანალიტიკური პორტალი

აკუსტიკური იარაღის გამოყენების საკითხი კანონით მოწესრიგდება.

თავდაცვისა და უშიშროების კომიტეტმა „იარაღის შესახებ“ საქართველოს კანონში ცვლილების შეტანის თაობაზე“ და „საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ“ კანონპროექტები განიხილა, რამაც ქვეყანაში აკუსტიკური იარაღის გამოყენების საკითხი უნდა მოაწესრიგოს.

„საკითხი მოქმედი კანონმდებლობით არ არის დარეგულირებული. შესაბამისად, ეს შესაძლებლობას აძლევს ყველას შეიძინოს, ატაროს და გამოიყენოს აღნიშნული იარაღი, მათ შორის, არასრულწლოვნებმაც. ზოგადად, აკუსტიკური იარაღი არ წარმოადგენს თავდაცვით იარაღს, მისი ერთადერთი დანიშნულება აკუსტიკური ეფექტის მოხდენა და ფუჭი ვაზნების გასროლაა. ეს იარაღი ხდება პოპულარული კრიმინალურ სამყაროში მისი ხელმისაწვდომობის, დაბალი ფასის და რეგულაციების არარსებობის გამო. სტატისტიკა და ანალიზი ადასტურებს, რომ ძალიან ბევრი ყაჩაღობა და სხვა ძალადობრივი დანაშაული ჩადენილია აღნიშნული იარაღის გამოყენებით“, – განაცხადა თავდაცვისა და უშიშროების კომიტეტის თავმჯდომარემ ირაკლი ბერაიამ.

საკანონმდებლო ინიციატივის წარდგენისას. ირაკლი ბერაიას განცხადებით, საკითხი წესრიგდება ევროკავშირის დირექტივის შესაბამისად და აკუსტიკური იარაღის გამოყენება შესაძლებელი გახდება მხოლოდ და მხოლოდ თეატრალურ წარმოდგენებში, სპორტულ ღონისძიებებში,ისტორიულ რეკონსტრუქციებსა და აღლუმებში. იკრძალება მისი ტარება.

კანონმდებლობით, ასევე, განისაზღვრება მისი გადატანა-გადაზიდვის და გადაგზავნის წესები, ხოლო მოცემული რეგულაციების დარღვევა გამოიწვევს ადმინისტრაციულ სამართალდარღვევათა კოდექსით განსაზღვრულ პასუხისმგებლობას.

ადმინისტრაციულ სამართალდარღვევათა კოდექსში შესატანი ცვლილებები განპირობებულია სწორედ „იარაღის შესახებ“ კანონში ინიცირებული ცვლილებით და ითვალისწინებს პასუხისმგებლობას აკუსტიკური იარაღის ტარების, მისი გადატანა-გადაზიდვის და გადაგზავნის წესის დარღვევისთვის. საკანონმდებლო ინიციატივის ავტორები არიან პარლამენტის წევრები: ირაკლი ბერაია, ანრი ოხანაშვილი და ალექსანდრე ტაბატაძე.

error: სტატიის დაკოპირება აკრძალულია!!!