აპრილი 21, 2021

Gmas.ge

ქართული სამხედრო ანალიტიკური პორტალი

“აფხაზეთი საქართველოა” – გოგო, რომელმაც ეს TitTok-ზე თქვა, აფხაზეთის პოლიციამ გამოკითხვაზე დაიბარა.

აფხაზეთის თვითგამოცხადებული რესპუბლიკის შინაგან საქმეთა სამინისტრო სწავლობს სოციალურ ქსელ ტიკ-ტოკში გამოქვეყნებული ვიდეოს ამბავს, სადაც 19 წლის ალიონა ტანია ამბობს ფრაზას: “აფხაზეთი საქართველოა.”

უწყების პრესსამსახურის ცნობით, სამართალმცველებმა ამ ვიდეოს ინტერნეტში გამოჩენის შემდეგ “აღშფოთებული მოქალაქეებისგან” არაერთი მიმართვა მიიღეს, რის შემდეგაც გადაწყვიტეს, გასაუბრებოდნენ ვიდეოს ავტორს და მის მშობლებს, მოგვიანებით კი გაავრცელეს ვიდეო სახელით ” აფხაზეთი საქართველო არ არის”, სადაც ასახულია ახალგაზრდა ქალის და მისი მშობლების დაკითხვა პოლიციაში.

ვიდეო, სადაც აფხაზი გოგო ამბობს თვითგამოცხადებული რეჟიმისთვის მიუღებელ ფრაზას, ტიკ-ტოკზე წაშლილია, თავად ტანიამ ბოდიში მოიხადა და თქვა, რომ ვიდეო მან სხვების თხოვნის გამო ატვირთა სოციალურ ქსელში, თუმცა მომხდარის გამო წუხს. აფხაზეთის შინაგან საქმეთა სამინისტრომ იუთუბის ოფიციალურ არხზე 29 მარტს გამოაქვეყნა ვიდეოჩანაწერი, სადაც ჩანს, პოლიციაში დაბარებული გოგო და მისი მშობლები.

“არ მეგონა არც ვიცოდი, რომ ჩვენი ქალიშვილი ასეთ რამეს გააკეთებდა, მე ომი გამოვიარე” – ამბობს ამ ვიდეოში ტანიას მამა.

“მე ყველას ბოდიშს ვუხდი” – ამბობს თავად ტანია.

“ბოდიშით ეს ამბავი არ დამთავრდება, ვიდეოში მონაწილე ყველა პირს დავიბარებთ გამოკითხვაზე” – აფხაზეთის პოლიციის ამ პოზიციით სრულდება ვიდეო. ტანიას მიერ ტიკტოკზე გამოქვეყნებულ ვიდეოში მის გარდა კიდევ ორი გოგო ჩანდა.

ეს არ არის პირველი შემთხვევა, როცა საოკუპაციო რეჟიმი სჯის ადამიანს, რომელიც საქართველოს მხარდააჭერას გამოხატავს. 2020 წლის 8 დეკემბერს აფხაზეთის საოკუპაციო რეჟიმმა 9-წლიანი პატიმრობა მიუსაჯა ირაკლი ბებუას, რომელმაც 2020 წლის 30 სექტემბერს, როცა სეპარატისტული რეგიონი „დამოუკიდებლობის და გამარჯვების დღეს“, აღნიშნავდა, სცადა დაეწვა ე.წ აფხაზეთის დროშა და დე ფაქტო სიმბოლოები.

shares
error: სტატიის დაკოპირება აკრძალულია!!!