დეკემბერი 9, 2022

Gmas.ge

ქართული სამხედრო ანალიტიკური პორტალი

ბორის ჯონსონმა უკრაინის დახმარების ოთხპუნქტიანი გეგმა წარმოადგინა.

დიდი ბრიტანეთის პრემიერ-მინისტრმა ბორის ჯონსონმა 19 ივნისს Sunday Times-ში გამოქვეყნებულ სტატიაში განაცხადა, რომ აუცილებელია უკრაინაში ხანგრძლივი ომისთვის მზადება და თქვა, რომ საჭიროა გრძელვადიანი სტრატეგია კიევის დასახმარებლად რუსეთთან დაპირისპირებაში. ის გამოვიდა ოთხპუნქტიანი გეგმით, რომელსაც, მისი აზრით, უნდა მისდიონ დასავლეთის ქვეყნებმა, რათა დაეხმარონ უკრაინას, საკუთარი პირობებით მიაღწიოს მშვიდობას.

მთავარი მიზეზი, რატომაც არის საჭირო უკრაინის მხარდაჭერა მიუხედავად ამასთან დაკავშირებული ხარჯებისა და სხვა პრობლემებისა, ჯონსონის თქმით, არის რუსეთის იმპერიული ამბიციები და აგრესიული გეგმები – მათ შორის დასავლეთის ქვეყნების მიმართ. ჯონსონის აზრით, თუკი რუსეთის პრეზიდენტ ვლადიმირ პუტინს უფლებას მისცემენ, უკრაინის იმ ტერიტორიების ანექსია მოახდინოს, რომლებიც ამჟამად უკავიათ რუსეთის ჯარებს, დასავლეთი საფრთხეში აღმოჩნდება.

„ასეთი გაუგებრობა ევროპაში აგრესორის უდიდესი გამარჯვება იქნებოდა მეორე მსოფლიო ომის პერიოდის შემდეგ. ჩვენ ვიცით, რომ პუტინი არ გაჩერდება უკრაინის დაყოფაზე. გასულ კვირაში მან თავი პეტრე დიდს შეადარა და რუსეთს მიანიჭა ‘მუდმივი უფლება დაიბრუნოს’ ტერიტორიები, რომლებზეც წარსულში ოდესღაც სახლობდნენ „სლავები“ – დოქტრინა, რომელიც ამართლებს ევროპაში უზარმაზარი ტერიტორიების ხელში ჩაგდებას, მათ შორის ნატოს წევრი ქვეყნების ტერიტორიებისა,“ – წერს ჯონსონი. ამასთან, ის აღნიშნავს უკრაინელების გმირობას საკუთარი ქვეყნის დაცვაში.

ჯონსონის თქმით, პუტინი ამჟამად გადავიდა ომზე, რომლის მიზანია მოწინააღმდეგის გამოფიტვა, მაგრამ დრო მის წინააღმდეგ მუშაობს. იმისთვის, რომ უკრაინას დავეხმაროთ ინიციატივის ხელში ჩაგდებაში, ბრიტანეთის პრემიერის აზრით, საჭიროა:

უკრაინის უზრუნველყოფა ყველა სახის საჭირო შეიარაღებით, საბრძოლო მასალით, ასევე მისი სამხედროების გაწვრთნა. კერძოდ, დიდი ბრიტანეთი გამოვიდა წინადადებით, 10 ათასი სამხედრო მოსამსახურე მოამზადოს 120 დღის განმავლობაში.

უკრაინის დახმარება საკუთარი სახელმწიფო ინსტიტუტების სტაბილურობის შენარჩუნებაში, რათა მან შეძლოს სახელმწიფო მოხელეთათვის პენსიებისა და ხელფასების გადახდა და წესრიგის დაცვა. ამისთვის აუცილებელია ფინანსური დახმარება.

უკრაინის სურსათის ექსპორტისთვის სახმელეთო მარშრუტების უზრუნველყოფა, რათა უკრაინამ შეძლოს ექსპორტიდან შემოსავლის მიღება.

უკრაინის პორტების ბლოკადის მოხსნაში დახმარება. ამისთვის ჯონსონი გამოვიდა წინადადებით, უკრაინას გადაეცეს შესაბამისი შეიარაღება და გამოყენებულ იქნეს დიპლომატიური ძალისხმევა, მათ შორის გაეროსი.

ჯონსონის აზრით, დასავლეთის ქვეყნების მიზანი უნდა იყოს ის, რომ უკრაინამ „შეძლოს ამ ომის იმ პირობებით დასრულება, რომლებსაც პრეზიდენტი ზელენსკი დააყენებს“.

ჯონსონმა სტატია გამოაქვეყნა კიევიდან დაბრუნების შემდეგ, სადაც მეორედ იყო ჩასული ომის დაწყების შემდეგ. სტატია გამოქვეყნდა მაშინ, როცა დასავლეთში მიმდინარეობს დისკუსიები შესაძლო დათმობებზე, რომლებზეც შეიძლებოდა წასულიყო უკრაინა მშვიდობის მისაღწევად, ასევე ომით „გადაღლაზე“.

გაეროს გენერალურმა მდივანმა იენს სტოლტენბერგმაც არ გამორიცხა, რომ ომი შეიძლება რამდენიმე წელს გაჭიანურდეს. Bild am Sonntag-ისთვის მიცემულ ინტერვიუში მან მოკავშირეებს მოუწოდა, „არ შეაჩერონ უკრაინის დახმარება“ დასავლეთისთვის მზარდი ხარჯების მიუხედავად. სტოლტენბერგის თქმით, ნატოს სამიტზე რუსეთს ოფიციალურად უწოდებენ არა პარტნიორს, არამედ უსაფრთხოების მუქარას და მოიწონებენ უკრაინის მორიგ დახმარებას იარაღით.

წყარო: http://hotnews.ge/

error: სტატიის დაკოპირება აკრძალულია!!!