საქართველოს თავდაცვის მინისტრმა კოჯორში მემორიალი გვირგვინით შეამკო

„უმძიმესი დღეებია საქართველოს ისტორიაში, მაგრამ იმავდროულად, ამ დღეებში მთელმა მსოფლიომ, მთელმა სამყარომ დაინახა, თუ რაოდენ დიდი იყო საქართველოს სახელმწიფოს მცველების სიმამაცე და პატრიოტიზმი“, – განაცხადა საქართველოს თავდაცვის მინისტრმა ირაკლი ჩიქოვანმა კოჯორში, 1921 თებერვალში, თბილისის მისადგომებთან საქართველოს დამოუკიდებლობისთვის ბრძოლაში დაღუპულთა მემორიალთან.

თავდაცვის მინისტრმა, საქართველოს პრემიერ-მინისტრთან, ირაკლი კობახიძესთან, პარლამენტის თავმჯდომარესთან, შალვა პაპუაშვილთან, თბილისის მერთან, კახა კალაძესთან ერთად, მემორიალი გვირგვინით შეამკო. დაღუპული გმირების ხსოვნას, ასევე პატივი მიაგეს თავდაცვის ძალების მეთაურმა, გენერალ-მაიორ გიორგი მათიაშვილმა და თავდაცვის ძალების წარმომადგენლებმა.

ირაკლი ჩიქოვანმა აღნიშნა, რომ დაღუპული გმირების თავდადების ისტორია საუკუნეებს გაუძლებს. „ჩვენ ყოველთვის გავიხსენებთ მათ, როგორც თავისუფლებისთვის ბრძოლის სიმბოლოს და როგორც უდიდესი პატრიოტიზმის გრძნობის მატარებელ ადამიანებს. დიდი მადლობა მათ, დიდება გმირებს!“ – განაცხადა თავდაცვის მინისტრმა.

2024 წლის 25 თებერვალს საბჭოთა ოკუპაციიდან 103 წელი გავიდა. საქართველოს დამოუკიდებლობისთვის ბრძოლას პირველი რესპუბლიკის არმიისა და სახალხო გვარდიის სამხედრო მოსამსახურეები, სამხედრო სკოლის იუნკერები და მოხალისეები შეეწირნენ. საქართველოს პარლამენტის დადგენილებით, 25 თებერვალი საბჭოთა ოკუპაციის დღედ არის გამოცხადებული.