F-16 ტიპის ავიაგამანადგურებლები უკრაინაში უფრო საშიში დავალებების შესრულებას იწყებენ
უკრაინის სამხედრო-საჰაერო ძალების ავიაგამანადგურებლები F16-ები უკრაინაში უფრო საშიში დავალებების შესრულებაზე გადავიდნენ. ამის შესახებ გამოცემა Forbes იუწყება.
როგორც ანალიტიკოსი დევიდ აქსი წერს, ახლა რუსული ფრთოსანი რაკეტების და უპილოტო საფრენი აპარატების განადგურების ნაცვლად უკრაინაში არსებულმა ავიაგამანადგურელებმა „ჰაერი-ჰაერის“ ტიპის რაკეტები, მაღალი სიზუსტის ავიაბომბები და რადარების ჩამხშობი აპარატურა მიიღეს და ისინი სულ უფრო ხშირად უტევენ რუსულ ძალებს ფრონტის ხაზზე.
დევიდ აქსის თქმით, ინტერნეტში სულ უფრო მეტი ფოტო და ვიდეო ვრცელდება, სადაც ჩანს F16-ები, რომლებიც უკრაინის აღმოსავლეთ ნაწილში საბრძოლო დავალებებს ასრულებენ.
„ზოგიერთი თვითმფრინავი აღჭურვილია პატრულირებისა და ჰაერსაწინააღმდეგო თავდაცვისთვის. მათ გააჩნიათ ორი AIM-9 ტიპის რაკეტა ინფრაწითელი დამიზნებით და AIM-120-ის ტიპის რაკეტები რადიოლოკაციური დამიზნებით. ასევე ამ თვითმფრინავს აქვს საწვავის სამი დამატებითი ავზი. სხვა ავიაგამანადგურებლებს, რომლებიც უფრო რთულ დავალებებს ასრულებენ, გააჩნიათ 8 ცალი 110 კილოგრამიანი ბომბი, „ჰაერი-ჰაერის“ ტიპის 4 რაკეტა, საწვავის ორი დამატებითი ავზი და ელექტრონული ბრძოლის AN/ALQ-131 სისტემა.
ასეთი შეიარაღებით F-16 შეუძლია რუსეთის ძალების მიზნების განადგურება როგორც მიწაზე, ასევე ჰაერში. ანალიტიკური ჯგუფის, Conflict Intelligence Team-ის ცნობით ეს თვითმფრინავები მოქმედებენ როგორც „მფრინავი ჰაერსაწინააღმდეგო თავდაცვა“ და მათ სარაკეტო იერიშების შესახებ გაფრთხილების თანამედროვე სისტემები აქვთ.
თვითმფრინავებს ასევე აქვთ რუსული საზენიტო რაკეტების საწინააღმდეგო სისტემები, რომლებიც ინფრაწითელი და რადიოლოკაციური დამიზნების რაკეტებისგან თავის დაცვის შესაძლებლობას აძლევს. ასევე თვითმფრინავებს აქვთ საზენიტო სისტემების რადარების ჩამხშობი სისტემა და რაკეტების გაშვების შესახებ გამაფრთხილებელი სისტემები.
ყველა ეს სისტემა უკრაინულ თვითმფრინავებს სრულად დაცულს ვერ გახდის, მაგრამ ის გარკვეულ უპირატესობას აძლევს და ბევრად სჯობია იმ თვითმფრინავებს, რასაც უკრაინა ომის საწყის ეტაპზე იყენებდა, ანუ მოძველებულ, საბჭოთა ტიპის ავიაგამანადგურებლებს.
