გერმანული Bild: ნორვეგია, ფინეთი და პოლონეთი მოსახლეობას რუსეთთან ომისთვის ამზადებენ
ნორვეგია, ფინეთი და პოლონეთი რუსეთიდან მომდინარე საფრთხის ფონზე რეზერვისტებისა და მშვიდობიანი მოსახლეობის სამხედრო მომზადებას აფართოებენ.
ამის შესახებ Bild იტყობინება.
გამოცემამ გააანალიზა სამი ქვეყნის თავდაცვის სასწავლო პროგრამები, რომლებიც მოიცავს რეზერვისტების სამხედრო მომზადებას, მშვიდობიანი მოსახლეობის მომზადებას და კრიზისულ სიტუაციებში მოქმედებებისთვის მომზადებას.
ნორვეგია
2026 წელი გამოცხადდა „ტოტალური თავდაცვის“ წლად, რაც გულისხმობს სამხედროების, სახელმწიფო ინსტიტუტების, საწარმოებისა და მოქალაქეების ჩართვას ქვეყნის დაცვაში. ამავდროულად, მოსახლეობის 85% მხარს უჭერს სავალდებულო სამხედრო სამსახურის შენარჩუნებას.
ნორვეგიულ მილიცია Heimevernet-ს 40 ათასზე მეტი რეზერვისტი ჰყავს, ხოლო რეგულარულ შეიარაღებულ ძალებში დაახლოებით 23 ათასი ჯარისკაცი მსახურობს. ფორმირებაში შედიან სამოქალაქო პროფესიების წარმომადგენლები, რომლებიც ყოველწლიურად გადიან სამხედრო მომზადებას.
სექტემბერში ოსლოში ჩატარდა წლის ყველაზე მასშტაბური Heimevernet-ის წვრთნა, რომელშიც 5000 ჯარისკაცი მონაწილეობდა. ქვეყანას ასევე აქვს 19000 თავდაცვითი ნაგებობა, რომელიც 5.5 მილიონიანი მოსახლეობის ნახევარზე მეტს იტევს.
ფინეთი
ქვეყანა ყოველწლიურად დაახლოებით 45000 რეზერვისტს ამზადებს. ისინი ურბანულ ომს, დრონების გამოყენებას და დაჭრილებისთვის სამედიცინო დახმარების გაწევას ვარჯიშობენ.
მოქალაქეებისთვის ნებაყოფლობითი თავდაცვის კურსები იმართება. ერთ-ერთი ბოლო წვრთნის დროს 2000-ზე მეტმა მონაწილემ კიბერშეტევები, ელექტროენერგიის გათიშვა და სარაკეტო დარტყმების საფრთხე ივარჯიშა.
ფინეთს ასევე აქვს დაახლოებით 50500 თავშესაფარი, რომლებიც 4.8 მილიონი ადამიანისთვისაა განკუთვნილი. მშვიდობიან დროს, მათი უმეტესობა გამოიყენება როგორც სპორტული დარბაზები, ავტოსადგომები და სხვა ობიექტები, რომლებიც საფრთხის შემთხვევაში 72 საათის განმავლობაში უნდა იყოს მზად გამოსაყენებლად.
პოლონეთი
პოლონეთში მოქმედებს პროგრამა სახელწოდებით wGotowości („მზადყოფნაში“), რომელიც შაბათ-კვირას ნებაყოფლობით ტრენინგებს ახორციელებს. მონაწილეებს სამხედრო საქმეებისა და ევაკუაციის საფუძვლებს ასწავლიან. ინიციატივის დაწყებიდან პირველივე კვირებში 18 000 მოხალისე დარეგისტრირდა.
პარალელურად, პოლონელი სამხედრო მოსამსახურეები ატარებენ Trenuj z wojskiem („ვარჯიში არმიასთან ერთად“) კურსებს. მშვიდობიან მოსახლეობას იარაღის, მათ შორის სასწავლო ყუმბარების, გამოყენებას ასწავლიან. ზოგიერთ ქალაქში ორგანიზატორებმა განაცხადების დიდი რაოდენობის გამო რიგის სიები შემოიღეს.
პოლონურ სკოლებშიც ინერგება სამხედრო წვრთნები. მოსწავლეები პირველადი დახმარებისა და გადარჩენის უნარებს სწავლობენ და 14 წლიდან სროლის გაკვეთილებს ესწრებიან. კერძოდ, ილჟას ქალაქში მეცხრე კლასელები მცირე ზომის იარაღით ვარჯიშობენ.
