თურქეთი საქართველოს სამხედრო მიზნებისთვის 4 500 000 ლირას გამოუყოფს
თურქეთი საქართველოს სამხედრო მიზნებისთვის 4 500 000 ლირას გამოუყოფს
31.10.2017
2017 წლის 31 ოქტომბერს პარლამენტის თავდაცვისა და უშიშროების კომიტეტის სხდომაზე სარატიფიკაციოდ წარმოდგენილ ხელშეკრულებებზე იმსჯელეს. სხდომაზე კომიტეტის წევრები „საქართველოს მთავრობასა და თურქეთის რესპუბლიკის მთავრობას შორის სამხედრო ფინანსური თანამშრომლობის“ შეთანხმებასაც გაეცნენ, რომელიც თავდაცვის მინისტრის მოადგილემ, ნუკრი გელაშვილმა წარმოადგინა. შეთანხმების თანახმად, თურქეთის მხარე საქართველოს 4 მილიონ 500 ათასს თურქული ლირის ექვივალენტ აშშ დოლარის ფინანსურ რესურს გრანტის სახით გამოყოფს, რომელიც ორი მიმართულებით დაიხარჯება. ნაწილი თანხით თურქეთში მოქმედი ადგილობრივი კომპანიებიდან სამხედრო მიზნებისთვის საქონლისა და მომსახურების შესყიდვა მოხდება, ხოლო 500 ათასი თურქული ლირა მარნეულის აეროპორტის ლოჯისტიკის მიმართულებით მოდერნიზაციისთვის გამოიყოფა. კომიტეტის წევრებმა მოიწონეს წარმოდგენილი ხელშეკრულებები და მხარი დაუჭირეს რატიფიცირებისთვის მათ პლენარულ სხდომაზე გატანას. ინფორმაციას პარლამენტის პრეს სამსახური ავრცელებს.
წყარო:parliament.ge
