აფხაზეთის ომის უნიკალური ვიდეო კადრები,აფხაზეთის ომში დაღუპული 19 წლის უკრაინელი მებრძოლის, ლიონია ობუხის დაკრძალვა სოხუმში, 1993 წელი. (ვიდეო)
youtube-ზე გავრცელდა ვიდეო, რომელზეც აფხაზეთის ომის უნიკალური კადრებია ასახული. ვიდეო “პიონერფილმის” ხელმძღვანელს, გრიგოლ ჩიგოგიძესა და ვახტანგ სამადაშვილს ეკუთვნით, რომლებიც 1992 წელს საომარ ზონაში იმყოფებოდნენ.
კადრში ჩანან უკრაინელი მებრძოლები, რომლებიც საქართველოს ერთიანობისთვის იბრძოდნენ 90-იან წლებში. ვიდეოზე ასახულია დაღუპული უკრაინელების დაკრძალვა. ერთ-ერთი მათგანის, 19 წლის ლიონია ობუხის მამა შვილის კუბოსთან შურისძიების პირობას დებს.
კადრებში ჩანან 1993 წლის 27 სექტემბერს დახვრეტილი ჟიული შარტავა და სოხუმის მერი გურამ გაბისკირია. ასევე უნსოს ლიდერები უკრაინული ნაციონალიზმის მიმდევრები დმიტრო კორჩინსკი, ვალერი ბობროვიჩი და იგორ მაზური. დღეს მოქმედი მოხალისეთა ბატალიონების უმეტესობა სწორედ უნსოს იდეოლოგიით ებრძვის მტერს ლუგანსკის და დონეცკის ოლქებში.
მამამისი, ასევე ბატალიონ „არგოს“ მებრძოლი ლიონია ობუხი ამბობს:
„ჩემს ხელებში დალია ჩემმა შვილმა სული, არც კი მჯერა, რომ ის აღარ არის. მე დავიფიცე რომ შურს ვიძიებ. აქ, ახლა გუმისთაზე გადის ფრონტის ხაზი, არა მხოლოდ, საქართველოსა და მოსკოვს შორის, არამედ უკრაინასა და მოსკოვს შორისაც.
თუ საქართველო გაუძლებს, გაძლებს უკრაინაც. ამიტომ ვიბრძვით ჩვენ აქ. მე დარწმუნებული ვარ რომ გამარჯვება ჩვენ დაგვრჩება, სამართლიაობამ ყოველთვის უნდა იზეიმოს. არ შეიძლება, რომ ეს მოსკოვის იმპერია სამუდამოდ იყოს. ჩვენ გავტეხავთ რუს დათვს.“
