დუშეთის მუნიციპალიტეტის საკრებულომ, ქალაქ დუშეთში მდებარე უსახელო ქუჩას 1921 წლის 24 თებერვალს მე-11 არმიასთან ბრძოლაში დაღუპული იუნკერ შალვა ერისთავის სახელი მიანიჭა.

დუშეთის მუნიციპალიტეტის საკრებულომ  2020  წლის 22  დეკემბერს   გამართულ სხდომაზე მიიღო N42  განკარგულება-“დუშეთის ადმინისტრაციული ერთეულის ქალაქ დუშეთში მდებარე უსახელო ქუჩისთვის  იუნკერ შალვა ერისთავის სახელის , ხოლო შესახვევებისთვის – იუნკერ შალვა ერისთავის ქუჩის პირველი და მეორე შესახვევების სახელის მინიჭების შესახებ  თანდართული რუკის მიხედვით.

აღნიშნული განკარგულების თანახმად: ქალაქ დუშეთში მდებარე უსახელო ქუჩას და ქუჩის ორ შესახვევს მიენიჭა იუნკერ შალვა ერისთავის სახელი. 

მუნიციპალიტეტის საკრებულოს, ქ.დუშეთში მდებარე უსახელო ქუჩისთვის  იუნკერ შალვა ერისთავის სახელის  სახელის მინიჭების   ინიციატივით დუშეთის მუნიციპალიტეტის საკრებულოს წევრმა გიორგი ასლმაზიშვილმა მიმართა. 

უსახელო ქუჩისთვის და მისი შესახევევბისათვის იუნკერ შალვა ერისთვის სახელის მინიჭების შესახებ  ინიციატივამ, დუშეთის მუნიციპალიტეტის საკრებულოში  და“გეოგრაფიული ობიექტების სახელწოდებათა დადგენის, ნორმალიზების, გამოყენების, რეგისტრაციის, აღრიცხვისა და დაცვის მიზნით, გეოგრაფიული ობიექტების სახელწოდებათა სფეროში მოქმედისამთავრობო კომისიაში –„მუნიციპალიტეტის ადმინისტრაციულ საზღვრებში მდებარე გეოგრაფიული ობიექტების სახელდების წესის დამტკიცების შესახებ“ საქართველოს მთავრობის 2015 წლის 1 ივნისის N239 დადგნილებით გათვალისწინებული პროცედურები  გაიარა.

      „სამშობლოს დაცვისას დაღუპულთა და ომის შემდეგ გარდაცვლილ მეომართა ხსოვნის უკვდავყოფის შესახებ“ საქართველოს კანონის მე-2 მუხლის „ვ“ პუნქტის თანახმად: სამშობლოს დაცვისას დაღუპულისა და ომის შემდეგ გარდაცვლილი მეომრის ხსოვნის უკვდავყოფის ერთ-ერთი ფორმაა სამშობლოს დაცვისას დაღუპულისა  და ომის შემდეგ გარდაცვლილი მეომრის სახელისა და გვარის დარქმევა ქუჩისათვის, მოედნისათვის, დაწესებულებისათვის, სკოლისათვის, აგრეთვე – სამხედრო ნაწილისა და გემისათვის, რომლებმაც განსაკუთრებით გამოიჩინეს თავი საბრძოლო ოპერაციების ჩატარების დროს.

“დუშეთის ადმინისტრაციული ერთეულის ქალაქ დუშეთში უსახელო ქუჩისთვის იუნკერ შალვა ერისთავის  სახელისა და უსახელო ქუჩის შესახევევებისთვის  იუნკერ შალვა ერისთავის ქუჩის პირველი და მეორე შესახვევების  სახელის მინიჭების შესახებ”   დუშეთის მუნიციპალიტეტის საკრებულოს 2020 წლის 22 დეკემბრის N42 განკარგულება გადაგზავნილია საჯარო რეესტრის ეროვნულ სააგენტოში, სადაც  განახორციელდება  გეოგრაფიული ობიექტების სისტემურ ნუმერაცია.რის შემდეგ აღნიშნულ ქუჩაზე მცხოვრებ მოქალაქეებს დაზუსტებული საცხოვრებელი მისამართი ექნებათ.

შალვა ერისთავი 1897 წელს დაიბადა. 1919 წელს სწავლა თბილისის სამხედრო სკოლაში დაიწყო, რომლის ორწლიანი კურსის დასრულების შემდეგ, ლეიტენანტის წოდება უნდა მიეღო. 1920 წლის ზაფხულში მონაწილეობდა ლაგოდეხში განლაგებული მეექვსე ქვეითი ათასეულის გაბოლშევიკებული ასეულის განიარაღებაში.

რუსეთ-საქართველოს ომის დროს, 1921 წლის 18-24 თებერვალს, შალვა ერისთავი, სამხედრო სკოლის კურსანტებთან ერთად, თბილისის დაცვისთვის იბრძოდა. იუნკრებმა, 17 თებერვალს, თბილისის თავდაცვის მარჯვენა სექტორის ტაბახმელას მონაკვეთი დაიკავეს. მოწინააღმდეგემ ამ მონაკვეთში შეტევა 19 თებერვალს დაიწყო, თუმცა 19-23 თებერვლის ბრძოლებში ქართული არმიის, გვარდიისა და სამხედრო სკოლის მებრძოლებმა მისი შეჩერება მოახერხეს.

გადამწყვეტი ბრძოლები თბილისის თავდაცვის ყველა სექტორში, მათ შორის ტაბახმელას მონაკვეთზე, 24 თებერვალს გაიმართა. თბილისის თავდაცვის ამ მონაკვეთზე, განსაკუთრებულ სტრატეგიულ წერტილს სიმაღლე 1046, იგივე სანგარი N4 წარმოადგენდა. დღის განმავლობაში, მოწინააღმდეგემ N4 სანგარზე რამდენიმე იერიში მიიტანა და ნაშუადღევს, ამ მონაკვეთზე, არმიის პირველი ათასეულის ასეულის თავდაცვითი ხაზი გაარღვია. მოწინააღმდეგემ სანგრის სამივე ზოლი დაიკავა და სანგრის უკან განლაგებულ ლეიტენანტ მესხიშვილის საარტილერიო ბატარეასთან გავიდა. არტილერისტები ხელჩართულ ბრძოლაში ჩაებნენ. ამ დროს, სანგრიდან რამდენიმე ასეულ მეტრში, იუნკერთა სამი ოცეული ისვენებდა. პოლკოვნიკმა ალექსანდრე ჩხეიძემ იუნკერთა სამი ოცეული, ოფიცრების – შავდიას, ხოშტარიას და ჩაჩუას მეთაურობით არტილერისტების დასახმარებლად და მე-4 სანგრის დასაბრუნებლად დაძრა. იუნკრებმა მოწინააღმდეგეს უკან დაახევინეს, თუმცა სანგრის დაბრუნება გართულდა, რადგან მოწინააღმდეგე სიმაღლეზე „მაქსიმის“ ტყვიამფრქვევით გამაგრდა და მოშიშვლებულ ველზე, იუნკრებს კონტრშეტევის საშუალებას არ აძლევდა.

შალვა ერისთავმა, რომელიც სამხედრო სკოლაში სწავლის დაწყებამდე თბილისში განთქმული ფეხბურთელი და მორბენალი იყო, ტყვიამფრქვევამდე არსებული მანძილი სწრაფად გაირბინა, ხიშტით განგმირა მემიზნე და საკუთარი სიცოცხლის ფასად საცეცხლე პოზიცია გააუვნებელყო, რითაც თანამებრძოლებს საშუალება მისცა კონტრშეტევა წარმატებით დაესრულებინათ. კონტრშეტევას მის გარდა ორი იუნკერი, ოთარ ლორთქიფანიძე და იოსებ ჯანდიერი შეეწირა. დაიჭრა სამი ოფიცერი და 15 იუნკერი.

როდესაც სიკვდილის პირას მყოფ ერისთავს სანიტრები მიუახლოვდნენ, იუნკერმა მათ უკანასკნელი სიტყვები შესძახა: „დადექ ვინა ხარ?“ და სული განუტევა. გენერალი ალექსანდრე ჩხეიძის მოგონებით: ,,ამ ბრძოლაში იუნკრების რაინდობისა და მისი დიადი სილამაზის სამარადისო სიმბოლურ სურათად დარჩება, ტყვიამფრქვევზე მწოლიარე, განგმირული შალვა ერისთავი“.  შალვა ერისთავი ვერის ძველ სასაფლაოზე, დღევანდელ ვერის ბაღში დაკრძალეს.

 

 

მოამზადა იოსებ ჭონქაძემ

error: სტატიის დაკოპირება აკრძალულია!!!