ფინეთი უკრაინას საარტილერიო მასალებს გაყინული რუსული აქტივებიდან მიღებული თანხების გამოყენებით მიაწვდის
ფინეთი უკრაინას საარტილერიო საბრძოლო მასალებს რუსული გაყინული აქტივებიდან მიღებული თანხების გამოყენებით მოამარაგებს.
ამის შესახებ ფინეთის თავდაცვის სამინისტროს ოფიციალური ვებგვერდი იტყობინება.
მომარაგება ევროკავშირის ინიციატივის ფარგლებში განხორციელდება და მისი საერთო ღირებულება 90 მილიონი ევრო იქნება.
„ჩვენ შევძელით შეთანხმება ფინეთის მიერ უკრაინის მხარდაჭერის დამატებითი დაფინანსების შესახებ. თანხები გაყინული რუსული აქტივებიდან მოდის. პროდუქცია ფინური ინდუსტრიისგან შეძენილია ქვეყანაში დასაქმების გაზრდის მიზნით და იგზავნება უკრაინაში მისი თავდაცვის მხარდასაჭერად. შედეგით ძალიან კმაყოფილი ვარ“, – განაცხადა ფინეთის თავდაცვის მინისტრმა ანტი გაკანენმა.
მინისტრმა ხაზგასმით აღნიშნა, რომ ეს შეთანხმება მნიშვნელოვანია როგორც უკრაინის მხარდაჭერისთვის, ასევე თავად ფინეთში სამუშაო ადგილების შესაქმნელად.
ეს პაკეტი ავსებს ფინეთის მიერ უკვე გაცემულ 660 მილიონი ევროს ოდენობის დახმარებას. მიწოდების შინაარსის, მეთოდისა და ვადების შესახებ დეტალები ჯერ არ გახმაურებულა.
ადრე, უკრაინული პორტალი „სამხედრო“ იტყობინება, რომ შვედეთი, ნორვეგია, ფინეთი და დანია შეთანხმდნენ ერთი და იგივე საარტილერიო საბრძოლო მასალის გამოყენებაზე.
საბრძოლო მასალების სრულად გაერთიანების გადაწყვეტილება მიღებული იქნა მათი წარმოების გაზრდის, ასევე სხვადასხვა ტიპის საარტილერიო სისტემების გამოყენების შესაძლებლობის მიზნით.
პირველ რიგში, საუბარია 155 მმ-იან საბრძოლო მასალაზე, რომელიც უნდა იყოს შესაფერისი თვითმავალი და ბუქსირებადი საარტილერიო სისტემებისთვის, ასევე 81 მმ და 120 მმ კალიბრის ნაღმტყორცნების ჭურვებისთვის.
გარდა ამისა, ქვეყნებს აქვთ სხვადასხვა საარტილერიო სისტემები, მაგალითად, ნორვეგია და ფინეთი იყენებენ სამხრეთ კორეულ K9 Thunder თვითმავალი ქვემეხებს, შვედეთი – ადგილობრივ Archer სისტემას, ხოლო დანია – ისრაელის ATMOS 2000 თვითმავალი ქვემეხებს.
მოამზადა იოსებ ჭონქაძემ
